ചിറ്റഗോങ്: ആവേശകരമായ അന്ത്യത്തിലേക്ക് നീങ്ങിയ ആദ്യ ക്രിക്കറ്റ് ടെസ്റ്റില്‍ ബംഗ്ലാദേശിനെ 22 റണ്‍സിനു കീഴടക്കി ഇംഗ്ലണ്ട് വിജയം പിടിച്ചു. അവസാന ദിനത്തില്‍ ബംഗ്ലാദേശിനു വിജയിക്കാന്‍ രണ്ടു വിക്കറ്റ് കൈയിലിരിക്കേ 33 റണ്‍സായിരുന്നു ആവശ്യം. എന്നാല്‍ ആതിഥേയരെ പത്തു റണ്‍സ് മാത്രം ചേര്‍ക്കാനേ ഇംഗ്ലീഷ് ബൗളര്‍മാര്‍ അനുവദിച്ചുള്ളു. 81ാം ഓവര്‍ എറിയാനെത്തിയ ബെന്‍ സ്റ്റോക്‌സ് ആദ്യ പന്തില്‍ തൈജുല്‍ ഇസ്‌ലാമിനേയും മൂന്നാം പന്തില്‍ ഷഫിയുല്‍ ഇസ്‌ലാമിനേയും വിക്കറ്റിനു മുന്നില്‍ കുരുക്കി സന്ദര്‍ശകര്‍ക്ക് മിന്നും ജയം സമ്മാനിക്കുകയായിരുന്നു. ബംഗ്ലാദേശിന്റെ പ്രതീക്ഷയായിരുന്ന സാബിര്‍ റഹ്മാന്‍ 64 റണ്‍സോടെ മറുവശത്ത് പുറത്താകാതെ നിന്ന് പരാജയം നിസ്സഹായനായി നോക്കി കണ്ടു.
ഇംഗ്ലണ്ട് ഒന്നാം ഇന്നിംഗ്‌സില്‍ 293 റണ്‍സ്. രണ്ടാം ഇന്നിംഗ്‌സില്‍ 240 റണ്‍സ്. ബംഗ്ലാദേശ് ഒന്നാം ഇന്നിംഗ്‌സില്‍ 248 റണ്‍സ്. രണ്ടാം ഇന്നിംഗ്‌സില്‍ 263 റണ്‍സ്.
286 റണ്‍സ് വിജയ ലക്ഷ്യമാണ് ഇംഗ്ലണ്ട് ബംഗ്ലാദേശിനു മുന്നില്‍ വച്ചത്. ബംഗ്ലാദേശിനു മികച്ച തുടക്കം ലഭിച്ചെങ്കിലും മധ്യനിരയില്‍ തുടര്‍ച്ചയായി വിക്കറ്റുകള്‍ നഷ്ടമായത്  തിരിച്ചടിയായി. ഇമുറുല്‍ ഖയ്‌സ് (43), നായകന്‍ മുഷ്ഫിഖുര്‍ റഹീം (39) എന്നിവരും തിളങ്ങി. ഇംഗ്ലണ്ടിനായി ബെറ്റി മൂന്നും മൊയിന്‍ അലി, ബ്രോഡ്, സ്റ്റോക്‌സ് എന്നിവര്‍ രണ്ടും റാഷിദ് ഒരു വിക്കറ്റും വീഴ്ത്തി.
നേരത്തെ ഇംഗ്ലണ്ടിനായി രണ്ടാമിന്നിങ്‌സില്‍ 85 റണ്‍സ് നേടി സ്റ്റോക്‌സ് മികവില്‍ നിന്നിരുന്നു. ഓള്‍റൗണ്ട് മികവിലൂടെ വിജയത്തില്‍ നിര്‍ണായക സ്ഥാനമലങ്കരിച്ച സ്റ്റോക്‌സ് കളിയിലെ കേമനായി.