അന്നമനട: ഗ്രാമപഞ്ചായത്ത് പരിധിയിലുള്ള അനധികൃത അറവ് ശാലകള്‍ അടച്ചു പൂട്ടണമെന്ന് അന്നമനട ഗ്രാമക്ഷേമസമിതി യോഗം അധികൃതരോടാവശ്യപ്പെട്ടു. വിവരാവകാശ നിയമപ്രകാരം അന്നമനട ഗ്രാമപഞ്ചായത്ത് അധികാരികളില്‍ നിന്നും ലഭിച്ച വിവരമനുസരിച്ച് പഞ്ചായത്ത് പരിധിയില്‍ അംഗീകാരമുള്ള അറവുശാലകളോ മാംസവില്‍പന ശാലകളോ പ്രവര്‍ത്തിക്കുന്നില്ല. പഞ്ചായത്തിന്റെ വിവിധ ഭാഗങ്ങളില്‍ അറവുശാലകളും മാംസ വില്‍പന ശാലകളും പ്രവര്‍ത്തിക്കുന്നത് നിയമ വിരുദ്ധമായിട്ടാണ്.
ചത്തതും രോഗം ബാധിച്ചതുമായ മൃഗങ്ങളെ അനാരോഗ്യകരമായ സാഹചര്യങ്ങളില്‍ കൊന്ന് വില്‍പന നടത്തുകയാണ്. അനധികൃത അറവുശാലകള്‍ അടച്ചു പൂട്ടണമെന്ന സര്‍ക്കാര്‍ ഉത്തരവ് പാലിക്കാതെ പൊതുജനാരോഗ്യത്തിന് ഭീഷണിയായ ഇത്തരം വില്‍പന ശാലകള്‍ അടച്ചു പൂട്ടുവാന്‍ പഞ്ചായത്ത് അധികാരികള്‍ നടപടികള്‍ സ്വീകരിക്കണമെന്ന് സമിതി പ്രസിഡന്റ് അപ്പു കുറ്റിപ്പാട്ട് ആവശ്യപ്പെട്ടു.