വടകര: കൈനാട്ടി-നാദാപുരം സംസ്ഥാന പാതയില്‍ വള്ളിക്കാട് ബാലവാടിയില്‍ കഴിഞ്ഞ ദിവസം നടന്ന വാഹനാപകടത്തില്‍ ഒരു കുടുംബത്തിലെ മൂന്നു പേര്‍ മരിച്ച സംഭവത്തിനു കാരണക്കാരനായ ഡ്രൈവര്‍ അറസ്റ്റിലായി. തൂണേരി താഴെ കേളോത്ത് ടി.കെ ഹമീദ് (51) നെയാണ് വടകര സര്‍ക്കിള്‍ ഇന്‍സ്‌പെക്ടര്‍ എ. ഉമേഷ് അറസ്റ്റ് ചെയ്തത്. കഴിഞ്ഞ ശനിയാഴ്ച നടന്ന അപകടത്തില്‍ വള്ളിക്കാട് ബാലവാടിയിലെ പയ്യമ്പള്ളി ജാനു അമ്മ, ചെറുമക്കളായ രാഹുല്‍ രമേശ്, പാര്‍വണ എന്നിവര്‍ മരണപ്പെട്ടിരുന്നു. അപകട സ്ഥലത്തു നിന്ന് ഓടി രക്ഷപ്പെട്ട ഡ്രൈവറെ ഇന്നലെയാണ് അറസ്റ്റ് ചെയ്തത്. ബോധപൂര്‍വമല്ലാത്ത നരഹത്യ, അശ്രദ്ധമായി വാഹനമോടിക്കുക എന്നീ വകുപ്പുകള്‍ പ്രകാരമാണ് ഇയാള്‍ക്കെതിരേ കേസെടുത്തത്.
നാട്ടുകാരെ വിളിച്ചു വരുത്തി ഡ്രൈവറെ തിരിച്ചറിഞ്ഞതിനു ശേഷമാണ് അറസ്റ്റ് രേഖപ്പെടുത്തിയത്. അപകടസ്ഥലത്തു നിന്നു രക്ഷപ്പെട്ട ഡ്രൈവറെ അറസ്റ്റു ചെയ്യാത്തതില്‍ നാട്ടുകാരില്‍ നിന്ന് പ്രതിഷേധം ഉയരുകയും പൊലിസ് സ്റ്റേഷന്‍ മാര്‍ച്ച് ഉള്‍പ്പെടെയുള്ള സമരപരിപാടികള്‍ ആസൂത്രണം ചെയ്യുകയും ചെയ്തിരുന്നു. ഇതിനിടയിലാണ് സി.ഐ. അന്വേഷണം ഏറ്റെടുത്ത് ഡ്രൈവറെ അറസ്റ്റ് ചെയ്തത്.