കൊടുങ്ങല്ലൂര്‍: അഴീക്കോട്-മുനമ്പം ഫെറി സര്‍വീസിന് ഭീഷണിയായി മാറിയ മണല്‍തിട്ട നീക്കം ചെയ്യാന്‍ തുറമുഖ വകുപ്പ് നടപടികള്‍ സ്വീകരിച്ച് വരികയാണെന്ന് വകുപ്പ് മന്ത്രി രാമചന്ദ്രന്‍ കടന്നപ്പള്ളി നിയമസഭയില്‍ പറഞ്ഞു. ഇതുമായി ബന്ധപ്പെട്ട് സ്ഥലം എം.എല്‍.എ ഇ.ടി ടൈസണ്‍ നിയമസഭയില്‍ ഉന്നയിച്ച സബ്മിഷനുള്ള മറുപടിയിലാണ് മന്ത്രി ഇക്കാര്യം വ്യക്തമാക്കിയത്. കഴിഞ്ഞ ആറ് മാസത്തിലധികമായി അര കിലോമീറ്ററോളം ദൈര്‍ഘ്യമുള്ള ജങ്കാര്‍ ഫെറിയിലെ അഴീക്കോടും, മുനമ്പത്തും ഉള്ള ജെട്ടികളില്‍ മണല്‍ വന്നടിയുന്നതു മൂലം ജങ്കാര്‍ പലപ്പോഴും അപകടഭീഷണി നേരിട്ടുവരികയാണ്. ഇതുമൂലം ജങ്കാര്‍ സര്‍വിസ് നടത്തികൊണ്ടുപോകാന്‍ ബുദ്ധിമുട്ടാണെന്ന് ജങ്കാര്‍ നടത്തിപ്പുകാരും ജില്ലാ പഞ്ചായത്ത് സെക്രട്ടറിയും തുറമുഖ വകുപ്പിനെ അറിയിച്ചിരുന്നു. ഇതേ തുടര്‍ന്ന് മണല്‍തിട്ടകള്‍ നീക്കം ചെയ്യാന്‍ തുറമുഖ വകുപ്പ് നടപടികള്‍ സ്വീകരിച്ചിരുന്നു.
മണല്‍തിട്ട നീക്കം ചെയ്യാന്‍ തുറമുഖ വകുപ്പ് കേരള സ്റ്റേറ്റ് മാരിടൈം ഡെവലപ്പ്‌മെന്റ് കോര്‍പ്പറേഷന് നിര്‍ദേശം നല്‍കിയിരുന്നു. അഴീക്കോട്ടെ നിര്‍ദ്ദിഷ്ട കൊടുങ്ങല്ലൂര്‍ തുറമുഖത്തിലേക്കുള്ള കപ്പല്‍ ചാല്‍ നിര്‍മാണത്തോടൊപ്പം ഈ പ്രവര്‍ത്തികള്‍ ചെയ്യുവാനായിരുന്നു നിര്‍ദേശം. എന്നാല്‍ ഇതുമായി ബന്ധപ്പെട്ടുള്ള ടെന്‍ഡര്‍ നടപടികളിലും മറ്റും ഉണ്ടായ തടസങ്ങളിലും കോടതി നടപടികളും മൂലം പ്രവര്‍ത്തി സ്തംഭനാവസ്ഥയിലായിരുന്നു.