ഡല്‍ഹി ഡൈനാമോസ് 1-1 പൂനെ സിറ്റി എഫ്.സിന്യൂഡല്‍ഹി: ഐ.എസ്.എല്ലില്‍ ഡല്‍ഹി ഡൈനമോസ്- എഫ്.സി പൂനെ സിറ്റി മത്സരം സമനിലയില്‍. ഓരോ ഗോള്‍  നേടിയാണ് ഇരു ടീമുകളും സമനിലയില്‍ പിരിഞ്ഞത്. സ്വന്തം മണ്ണില്‍ ആദ്യ പകുതിയില്‍ ഗോള്‍ വഴങ്ങിയ ഡല്‍ഹി രണ്ടാം പകുതിയില്‍ തിരിച്ചടിച്ചാണ് സമനില പിടിച്ചുവാങ്ങിയത്. കളിയിലുടനീളം ഇരു ടീമുകളും മികച്ച മുന്നേറ്റങ്ങള്‍ നടത്തിയപ്പോള്‍ ഇരു പക്ഷത്തേയും ഗോള്‍ കീപ്പര്‍മാരുടെ പ്രകടനങ്ങള്‍ മികവുറ്റതായിരുന്നു. ഒന്നാം പകുതിയുടെ അവസാനിക്കാന്‍ നിമിഷങ്ങള്‍ മാത്രമുള്ളപ്പോഴാണ് പൂനെ മുന്നില്‍ കടന്നത്. ഇഞ്ച്വറി ടൈമില്‍ രാഹുല്‍ ബെക്കെ നല്‍കിയ ക്രോസില്‍ നിന്നു ജീസസ് റോഡ്രിഗസ് ടാറ്റോ ഹെഡ്ഡറിലൂടെ പന്ത് ഡല്‍ഹി വലയിലാക്കുകയായിരുന്നു. പോസ്റ്റിന്റെ മൂലയില്‍ തട്ടി പന്തു വലയില്‍ കയറുമ്പോള്‍ ഡല്‍ഹി ഗോളിക്ക് ഒന്നും ചെയ്യാനുണ്ടായിരുന്നില്ല.
രണ്ടാം പകുതിയില്‍ ഇരു ടീമുകളും ആക്രമണം തുടര്‍ന്നു. സ്വന്തം തട്ടകത്തില്‍ ഒരു ഗോളിനു പിന്നില്‍ നിന്ന ഡല്‍ഹി ആക്രമണം കടുപ്പിച്ചെങ്കിലും 79ാം മിനുട്ടിലാണ് അവരുടെ ആശ്വാസ ഗോളെത്തിയത്.  മിലന്‍ സിങിന്റെ വകയായിരുന്നു ഡല്‍ഹിക്ക് ആശ്വാസം ലഭിച്ചത്. മാഴ്‌സലോ പെരേരയുടെ ഫ്രീ കിക്ക് മിലന്‍ ഗോളിലേക്കു തിരിച്ചുവിടുകയായിരുന്നു. രണ്ടാം പകതിയില്‍ പലപ്പോഴും മത്സരം കൈയാങ്കളിയിലേക്ക് നീങ്ങിയിരുന്നു.
ആറു മത്സരങ്ങളില്‍ നിന്നു ഏഴു പോയിന്റുമായി ഡല്‍ഹി ആറാം സ്ഥാനത്തും ഇത്രയും കളികളില്‍ നിന്നു ആറു പോയിന്റുമായി പൂനെ ഏഴാം സ്ഥാനത്തും.