തലശ്ശേരി: പിണറായിയിലെ ബി.ജെ.പി പ്രവര്‍ത്തകന്‍  കൊല്ലനാണ്ടി വീട്ടില്‍ രമിത്തി(26)നെ കൊലപ്പെടുത്തിയ കേസില്‍ അറസ്റ്റിലായ രണ്ട് സി.പി.എം പ്രവര്‍ത്തകരെ തിരിച്ചറിയല്‍ പരേഡിനിടെ രമിത്തിന്റെ അമ്മ നാരായണി തിരിച്ചറിഞ്ഞു. ധര്‍മ്മടം പൊലിസ് സ്റ്റേഷനിലായിരുന്നു തിരിച്ചറിയല്‍ പരേഡ്. പിണറായിയിലെ ചുമട്ട് തൊഴിലാളിയും സി.ഐ.ടി.യു പ്രവര്‍ത്തകനുമായ പിണറായി പുതിയപുരയില്‍ പി.കെ അഹദ്(25), ഡി.വൈ.എഫ്.ഐ എരുവട്ടി വില്ലേജ് ജോ.സെക്രട്ടറി പിണറായി വെണ്ടുട്ടായിയിലെ കണ്ണോത്ത് വീട്ടില്‍ നിജോയ്(30) എന്നിവരെയാണ് അന്വേഷണ ഉദ്യോഗസ്ഥനായ സി.ഐ വേണുഗോപാലിന്റെ നേതൃത്വത്തില്‍ തിരിച്ചറിയല്‍ പരേഡിന് വിധേയരാക്കിയത.് കഴിഞ്ഞ ദിവസം ജുഡീഷ്യല്‍ കസ്റ്റഡിയില്‍ വിട്ടു നല്‍കിയ പ്രതികളെ വിവിധ സ്ഥലങ്ങളില്‍ കൊണ്ടുപോയി കൂടുതല്‍ തെളിവുകള്‍ ശേഖരിച്ചു. രമിത്തിനെ കൊലപ്പെടുത്താന്‍ ഉപയോഗിച്ച മഴു ഉള്‍പ്പെടെയുള്ള ആയുധങ്ങള്‍ പൊലിസ് കണ്ടെടുത്തിരുന്നു. പ്രതികളുടെ കസ്റ്റഡി കാലാവധി അവസാനിക്കുന്നതിനാല്‍ ഇന്ന് വൈകുന്നേരത്തോടെ പ്രതികളെ കോടതിയില്‍ ഹാജരാക്കേണ്ടതുണ്ട്.
 ഇതിനിടെ കേസിലുള്‍പ്പെട്ട മറ്റ് പ്രതികള്‍ക്ക് വേണ്ടി പൊലിസ് അന്വേഷണം ഊര്‍ജ്ജിതമാക്കി.