മലപ്പുറം: പാണക്കാട് വില്ലേജില്‍ ആരംഭിക്കുമെന്നറിയിച്ച ജില്ലയുടെ കാന്‍സര്‍ സെന്റര്‍ തറക്കല്ലിലൊതുങ്ങുമോ..? മലപ്പുറം ക്യാന്‍സര്‍ സെന്റര്‍ ആന്റ് റിസര്‍ച്ച് ഇന്‍സ്റ്റിറ്റ്യൂട്ട് എന്ന പേരില്‍ ഇന്‍കെല്‍ പാര്‍ക്കിലെ 25 ഏക്കര്‍ ഭൂമിയില്‍ തുടങ്ങുമെന്നറിയിച്ചിരുന്ന കേന്ദ്രമാണു തറക്കല്ലിലൊതുങ്ങി നില്‍ക്കുന്നത്. കഴിഞ്ഞ സര്‍ക്കാര്‍ ഭരണത്തില്‍ നിന്നിറങ്ങുന്നതിനു മാസങ്ങള്‍ക്കുമുമ്പാണു കാന്‍സര്‍ സെന്റര്‍ ആരംഭിക്കുന്നതിനായി 25 ഏക്കര്‍ സ്ഥലം വിട്ടുനല്‍കാന്‍ മന്ത്രിസഭ തീരുമാനം എടുത്തത്.
ഇതിനെ തുടര്‍ന്ന് കാന്‍സര്‍ സെന്ററിന്റെ തറക്കല്ലിടലും നടത്തിയിരുന്നു. സര്‍ക്കാര്‍ ഉത്തരവിന്റെ ചുവടു പിടിച്ച് ആഴ്ചകള്‍ക്കകം തന്നെ ഭൂമി വിട്ടു നല്‍കുന്നതിനുള്ള റവന്യൂ നടപടികള്‍ പൂര്‍ത്തിയാക്കുമെന്ന് അറിയിച്ചിരുന്നു. സര്‍ക്കാര്‍ ഉത്തരവിറങ്ങി ഒന്‍പതു മാസമായെങ്കിലും നിര്‍മാണ പ്രവൃത്തികള്‍ തുടങ്ങുന്നതിനാവശ്യമായ യാതൊരു നടപടികളും ഉണ്ടായിട്ടില്ല. കേന്ദ്രം സ്ഥാപിക്കുന്നതിനാവശ്യമായ നടപടികള്‍ പ്രാരംഭ ഘട്ടത്തിലാണെന്നും എന്നാല്‍ നാളിതുവരെ സ്ഥലം പതിച്ചു നല്‍കിയിട്ടില്ലെന്നുമാണ് ഇതു സംബന്ധിച്ചു നിയമസഭയില്‍ സബ്മിഷന്‍ അവതരിപ്പിച്ച പി. ഉബൈദുള്ള എം.എല്‍.എക്ക് ലഭിച്ച മറുപടി.  
റവന്യൂ വകുപ്പില്‍ നിന്നു സ്ഥലം പതിച്ചു നല്‍കുന്നതിനുള്ള നടപടിക്രമങ്ങള്‍ നടന്നുവരുന്നുവെന്നാണ് ഇതു സംബന്ധിച്ചു മന്ത്രി നിയമസഭയില്‍ പറഞ്ഞത്. ഭൂമി കൈമാറ്റം ഉടന്‍ പൂര്‍ത്തിയാക്കി മൂന്നു വര്‍ഷത്തികം ആദ്യഘട്ട പ്രവര്‍ത്തനം ആരംഭിക്കുമെന്നായിരുന്നു ശിലാസ്ഥാപന സമയത്ത് അറിയിച്ചിരുന്നത്. ലോകത്തെ മികച്ച ക്യാന്‍സര്‍ ചികില്‍സ സാങ്കേതിക ഉപകരണങ്ങള്‍ ഘട്ടംഘട്ടമായി സ്ഥാപിക്കാനായി ഉദ്ദേശിച്ചിരുന്ന കേന്ദ്രം ഒന്നുമാവാത്ത അവസ്ഥയിലാണിപ്പോള്‍.
340 കോടി രൂപ ചെലവിലാണു ക്യാന്‍സര്‍ സെന്റര്‍ ആന്‍ഡ് റിസര്‍ച്ച് ഇന്‍സ്റ്റിറ്റ്യൂട്ട് ആരംഭിക്കാനുദ്ദേശിച്ചിരുന്നത്. ക്യാന്‍സര്‍ തുടക്കത്തില്‍ തന്നെ കണ്ടെത്തുന്നതിനും മികച്ച ചികില്‍സയിലൂടെ രോഗം പൂര്‍ണമായും ഭേദമാക്കുന്നതിനുമുള്ള സൗകര്യങ്ങള്‍ ഇവിടെ ലഭ്യമാക്കുമെന്നും അറിയിച്ചിരുന്നു.  
ആധുനിക രോഗനിര്‍ണയ ഉപകരണങ്ങളും സംവിധാനങ്ങളും മികച്ച ലാബോറട്ടറി, ബ്ലഡ് ബാങ്ക്, മൂന്ന് റേഡിയേഷന്‍ മെഷീനുകള്‍, ബോണ്‍മാരോ ട്രാന്‍സ്പ്ലാന്റ്‌സ്റ്റെംസെല്‍, ഡയാലിസിസ് സംവിധാനങ്ങള്‍,  ക്യാന്‍സര്‍ ഭേദമായി അംഗവൈകല്യമുള്ളവരെ പുനരധിവസിപ്പിക്കാനുള്ള കേന്ദ്രം എന്നിവ ലക്ഷ്യമിട്ടിരുന്ന മലപ്പുറം ക്യാന്‍സര്‍ സെന്റര്‍ ആന്‍ഡ് റിസര്‍ച്ച് ഇന്‍സ്റ്റിറ്റ്യൂട്ട് തുടക്കത്തിലെ വിസ്മൃതിയിലായിരിക്കുകയാണ്. സംസ്ഥാനത്ത് തന്നെ ഏറ്റവും കൂടുതല്‍ കാന്‍സര്‍ രോഗികള്‍ ഉള്ള ജില്ലകളിലൊന്നായ മലപ്പുറത്തിനു കേന്ദ്രം യാഥാര്‍ഥ്യമായാല്‍ വലിയ ആശ്വാസമാകും.