കോയമ്പത്തൂര്‍: കേരളത്തില്‍നിന്നും 24 ലോറി ആശുപത്രി മാലിന്യങ്ങള്‍ കോയമ്പത്തൂരിലെ എട്ടിമടയില്‍ കൊണ്ടുവന്നു നിക്ഷേപിച്ച സംഭവത്തില്‍ അറസ്റ്റിലായ ലോറി ഡ്രൈവര്‍മാര്‍, ക്ലീനര്‍മാര്‍, മാലിന്യ ലോഡ് ഏജന്റുമാര്‍ എന്നിവര്‍ക്കെതിരേ ഗുണ്ടാസ് ആക്ട് ചുമത്താന്‍ പൊലിസ് ജില്ലാ കലക്ടര്‍ക്ക് കത്ത് നല്‍കി.
ഗുണ്ടാസ് ആക്ട് പ്രകാരം തടവിലാവുന്ന പ്രതികള്‍ക്ക് ഒരു വര്‍ഷം വരെ ജാമ്യം ലഭിക്കില്ല. പ്രതികള്‍ക്കെതിരേ ദേശീയ സുരക്ഷിതത്വ നിയമപ്രകാരം കേസെടുക്കുമെന്നാണ് വ്യാപകമായ ആവശ്യമെങ്കിലും ഇത് നിലനില്‍ക്കുന്നില്ലെന്നു നിയമ വിദഗ്ധര്‍ അഭിപ്രായപ്പെട്ടതിനെ തുടര്‍ന്നാണ് ഗുണ്ടാസ് ആക്ട് ചുമത്താന്‍ നിര്‍ദേശമുണ്ടായത്.
മാലിന്യങ്ങള്‍ ലോറികളില്‍ കയറ്റി അയച്ചുവിട്ട കോഴിക്കോട്, മലപ്പുറം, പാലക്കാട്, തൃശൂര്‍ നഗരങ്ങളിലെ ആശുപത്രി ഉടമകള്‍ക്കെതിരേയും കര്‍ശന നടപടിക്കു നീക്കം നടക്കുകയാണ്. മാലിന്യങ്ങള്‍ നിക്ഷേപിച്ചിട്ടുള്ള എട്ടിമട പ്രദേശത്ത് ഗുരുതരമായ അനാരോഗ്യ പ്രശ്‌നങ്ങള്‍ ഉയര്‍ത്തുന്നതിനാല്‍ മാലിന്യങ്ങള്‍ കോര്‍പറേഷന്റെ ലോറികളില്‍ കയറ്റി കേരളത്തിലേക്ക് തന്നെ തിരിച്ചയക്കാനാണ് നീക്കം.
കോയമ്പത്തൂരിലേക്ക് മാലിന്യങ്ങള്‍ കൊണ്ടുവന്ന 24 ലോറികളും സര്‍ക്കാരിലേക്കു കണ്ടുകെട്ടാന്‍ ജില്ലാ കലക്ടര്‍ രണ്ട് ദിവസത്തിനകം ഉത്തരവിറക്കും.