ചൊക്ലി : പ്രദേശത്തുകാരുടെ ഏറെക്കാലത്തെ ആഗ്രഹമായ തുരുത്തിപാലം യാഥാര്‍ഥ്യത്തിലേക്ക്. കിടഞ്ഞി തുരുത്തി മുക്കില്‍ നിന്നു എടച്ചേരി തുരുത്തി മുക്കിലെക്കും എറാമലക്കുമുള്ള പാലമാണ് യാഥാര്‍ഥ്യമാകുന്നത്. പാലം പണി പൂര്‍ത്തിയാവുന്നതോടെ കരിയാട്, എടച്ചേരി, ഏറാമല പഞ്ചായത്തുകളിലെ ജനങ്ങളുടെ ചിരകാല സ്വപ്‌നമാണ് യാഥാര്‍ഥ്യമാകുക.
എടച്ചേരി ഭാഗത്ത് അപ്രോച്ച് റോഡ് തര്‍ക്കത്തില്‍പ്പെട്ടു മുടങ്ങിയതോടെ പാലം പണി നിര്‍ത്തിവയ്‌ക്കേണ്ടി വരികയായിരുന്നു. ഊരാളുങ്കല്‍ ലേബര്‍ കോണ്‍ട്രാക്ടേര്‍സ് സൊസൈറ്റി പണി ഉപേക്ഷിച്ചതോടെ രണ്ടു തൂണുകളില്‍ പണി ഒതുങ്ങി.
പാനൂര്‍ മുനിസിപാലിറ്റി, കോഴിക്കോട് ജില്ലയിലെ എടച്ചേരി പഞ്ചായത്തുകളെ ബന്ധിപ്പിക്കുന്ന തുരുത്തി പാലത്തിന് വി.എസ് മന്ത്രിസഭയിലെ അംഗമായിരുന്ന ടി.യു കുരുവിളയാണ് ശിലയിട്ടത്.
പാലം നിര്‍മാണ പുരോഗതി വിലയിരുത്തുന്നതിനായി സ്ഥലം എം.എല്‍.എയും മന്ത്രിയുമായ കെ.കെ ശൈലജയുടെ തിരുവനന്തപുരത്തെ വീട്ടില്‍ രണ്ടു ദിവസം മുമ്പു യോഗം ചേര്‍ന്നിരുന്നു. എം.എല്‍.എ മാരായ സി.കെ നാണു, ഇ.കെ വിജയന്‍ തുടങ്ങിയവരും ഈ യോഗത്തില്‍ പങ്കെടുത്തു.