പൂവാര്‍: അറബിക്കടലും-നെയ്യാറും സംഗമിക്കുന്ന പൂവാര്‍ പൊഴിക്കരയില്‍ സഞ്ചാരികളുടെ തിരക്കേറുന്നു.
സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ളവര്‍ക്കു പുറമേ , വിദേശ സഞ്ചാരികളും ഇവിടേക്കെത്തുന്നുണ്ട്. കടലും കായലും ഒരുക്കുന്ന ദൃശ്യവിരുന്ന് ആസ്വദിക്കാനെത്തുന്നവരെ ചാക്കിട്ടു പിടിക്കാന്‍ സ്വകാര്യ ടൂറിസ്റ്റ് ഏജന്‍സികള്‍   സജീവമായി രംഗത്തിറങ്ങിയിട്ടുണ്ട്. നെയ്യാറില്‍ ബോട്ട് സവാരിയും റിസോര്‍ട്ടുമൊക്കെയൊരുക്കി സഞ്ചാരികളെ  ആകര്‍ഷിക്കാനുള്ള തത്രപ്പാടിലാണ് അവര്‍.  
പൊലിസ് പരിശോധന കര്‍ശനമാക്കിയതിനെ തുടര്‍ന്ന്  നിശ്ചലാവസ്ഥയിലായിരുന്ന  അനധികൃത ബോട്ട് സര്‍വീസുകള്‍ വീണ്ടും രംഗത്തിറങ്ങിയിട്ടുണ്ട്.  സുരക്ഷാ മാനദണ്ഡങ്ങളൊന്നും പാലിക്കാതെ തോന്നുംപടിയാണ് ഇവരുടെ പ്രവര്‍ത്തനം.
സര്‍ക്കാരിന്റെ ടൂറിസം വകുപ്പ് പക്ഷേ ഇതൊന്നും കണ്ട മട്ടില്ല. വകുപ്പധികൃതരുടെ പിടിപ്പുകേട് നിമിത്തം സര്‍ക്കാരിലേക്ക് എത്തേണ്ട കോടികളുടെ ലാഭമാണ് സ്വകാര്യ കമ്പനികള്‍ കൊണ്ടുപോകുന്നത്.
അതേസമയം മേഖലയില്‍ കൃത്യമായ സുരക്ഷാ സംവിധാനങ്ങളില്ലാത്തത് സഞ്ചാരികളെ ആശങ്കയിലാക്കുന്നുണ്ട്. കഴിഞ്ഞ പത്തു വര്‍ഷത്തിനുള്ളില്‍ മുപ്പതിലധികം ബോട്ടപകടങ്ങളാണ് ഇവിടെ നടന്നത്. അപകടങ്ങളെ തുടര്‍ന്നുള്ള ഒന്നു രണ്ട് ദിവസം ചര്‍ച്ചകളും പ്രഖ്യാപനങ്ങളും നടക്കുമെന്നല്ലാതെ ഫലപ്രദമായ സുരക്ഷാ നടപടികള്‍ അധികൃതര്‍ ഇതുവരെയും സ്വീകരിച്ചിട്ടില്ല. നീലലോഹിതദാസന്‍നാടാര്‍ മന്ത്രിയായിരുന്നപ്പോള്‍ മേഖലയിലെ ടൂറിസം വികസനം ലക്ഷ്യമിട്ട് സ്ഥാപിച്ച രണ്ട് കരിങ്കല്‍ മന്ദിരങ്ങള്‍ സാമൂഹ്യ വിരുദ്ധരുടെ താവളമായി മാറിക്കഴിഞ്ഞു.
മേഖലയുടെ ടൂറിസം സാധ്യതകള്‍ പ്രയോജനപ്പെടുത്തുന്നതിന് സര്‍ക്കാര്‍ അടിയന്തിര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.