പാലക്കാട്: കല്ലടിക്കോട്ട് പുള്ളിപുലിയെ ചത്തനിലയില്‍ കണ്ടെത്തി. മൂന്നു മുതല്‍ ഏഴു ദിവസം വരെ പഴക്കമുണ്ടെന്നു കരുതപ്പെടുന്ന ജഡം അഴുകിയ നിലയിലാണ്. കല്ലടിക്കോട് മൂന്നേക്കറ വനാതിര്‍ത്തിയില്‍ ഇന്നലെ രാവിലെയാണ് ജഡം കണ്ടത്.
ദുര്‍ഗന്ധം പരന്നതിനെ തുടര്‍ന്ന് നാട്ടുകാര്‍ നടത്തിയ പരിശോധനയിലാണ് പുള്ളിപുലി ചത്തുകിടക്കുന്നത് കണ്ടത്. ഉടന്‍തന്നെ ഇവര്‍ വനംവകുപ്പ് ഉദ്യോഗസ്ഥരെ വിവരം അറിയിച്ചു. ഇതെതുടര്‍ന്ന് മണ്ണാര്‍ക്കാട് ഡി.എഫ്.ഒ വി.പി. ജയപ്രകാശും സംഘവും കല്ലടിക്കോട് പൊലിസും സ്ഥലത്തെത്തി കൂടുതല്‍ പരിശോധനകള്‍ നടത്തി. ആറു മുതല്‍ ഏഴു വയസു വരെ പ്രായം കണക്കാക്കുന്ന പുലി ആണ്‍ വര്‍ഗത്തിലുള്ളതാണ്.
പുലിയുടെ മരണകാരണത്തെപ്പറ്റി കൂടുതല്‍ വ്യക്ത കൈവന്നിട്ടില്ല. ജഡം കിടന്ന സ്ഥലത്തു തന്നെ പോസ്റ്റുമോര്‍ട്ടം നടത്തി. പിന്നീട് അവിടെതന്നെ കുഴിച്ചിട്ടു. അതേസമയം കല്ലടിക്കോട് മലയോരമേഖലയില്‍ ഭീതിപരത്തുന്ന പുലിയാണോ ചത്തതെന്ന കാര്യം അന്വേഷണത്തിനുശേഷം മാത്രമെ പറയാന്‍ കഴിയുളളുവെന്ന് വനം വകുപ്പ് അറിയിച്ചു. ഒന്നില്‍ കൂടുതല്‍ പുലികള്‍ കല്ലടിക്കോട്ടും പ്രദേശത്തും ചുറ്റുന്നുണ്ടെന്നാണ് വനംവകുപ്പ് വിലയിരുത്തുന്നത്.
കഴിഞ്ഞ കുറച്ചുമാസങ്ങളായി കല്ലടിക്കോട് മേഖലയില്‍ പുലികളുടെ ശല്യം ഭീതിദമായി വര്‍ധിച്ചുകൊണ്ടിരിക്കുകയാണ്. ആറുമാസത്തിനിടെ മേഖലയില്‍ 23 ആടുകളെയും 12 നായ്ക്കളെയും പുലികള്‍ കൊന്നിട്ടുണ്ട്.
ഒന്നില്‍ കൂടുതല്‍ പുലികളുള്ള സാഹചര്യത്തില്‍ മനുഷ്യര്‍ ജാഗ്രത പാലിക്കണമെന്ന് വനം വകുപ്പ് മുന്നറിയപ്പ് നല്‍കുന്നുണ്ട്.