വടകര: കണ്ണൂക്കര കേളുബസാറില്‍ റോഡരികില്‍ നിര്‍ത്തിയ കാറിന്റെ ചില്ല് തകര്‍ത്ത് മോഷണം. അകത്തുണ്ടായിരുന്ന ലാപ്‌ടോപ്പും ഐഫോണും കവര്‍ന്നു. തൃക്കരിപ്പൂര്‍ ഇളംപാച്ചി വി.പി.എം ഹൗസില്‍ കുഞ്ഞഹമ്മദിന്റെ കാറിന്റെ പിന്നിലെ ചില്ല് തകര്‍ത്താണ് മോഷണം.
കേളുബസാറില്‍ ഭാര്യാവീട്ടില്‍ വന്ന ഇദ്ദേഹം ഇന്നോവ കാര്‍ വീട്ടിലേക്കു കയറ്റാന്‍ പറ്റാത്തതിനാല്‍ റോഡരികില്‍ നിര്‍ത്തിയിട്ടതായിരുന്നു.
ദേശീയപാത കേന്ദ്രീകരിച്ച് വാഹനങ്ങളില്‍ നിന്നു കവര്‍ച്ച നടത്തുന്നത് മേഖലയില്‍ വര്‍ധിച്ചു വരികയാണ്.
കഴിഞ്ഞ ഞായറാഴ്ച പുലര്‍ച്ചെ കൈനാട്ടിയില്‍ റോഡരികില്‍ നിര്‍ത്തിയ കാര്‍യാത്രക്കാരന്റെ പക്കല്‍ നിന്നും സ്വര്‍ണവും പണവും കവര്‍ന്നിരുന്നു. ഇതു സംബന്ധിച്ച് വടകര പൊലിസ് അന്വേഷണം നടത്തുന്നതിനിടെയാണ് കേളുബസാറിലെ മോഷണം.
ചോമ്പാല പൊലിസ് കേസെടുത്തു.

.