ന്യൂഡല്‍ഹി: കേരളത്തിലെ തെരുവുനായ ശല്യം പരിഹരിക്കണമെന്നാവശ്യപ്പെട്ട് സംസ്ഥാനത്തെ മുനിസിപ്പാലിറ്റി അധ്യക്ഷന്മാര്‍ ഡല്‍ഹിയിലെ ജന്തര്‍മന്ദിറില്‍ പ്രകടനം നടത്തി.
തെരുവുനായ്ക്കളുടെ ജീവനുവേണ്ടി വാദിക്കുന്ന കേന്ദ്രമന്ത്രി മേനകാ ഗാന്ധി ഇവയുടെ ആക്രമണത്തിന് ഇരയാകുന്നവരെ കാണുന്നില്ലെന്ന് ആരോപിച്ചായിരുന്നു മാര്‍ച്ച്. കേരള ഹൗസില്‍ നിന്ന് ജന്തര്‍മന്ദിറിലേക്കു നടന്ന പ്രതിഷേധ പ്രകടനം എം.ബി രാജേഷ് എം.പി ഉദ്ഘാടനം ചെയ്തു.
പരീക്ഷിച്ചു പരാജയപ്പെട്ട തെരുവുനായ്ക്കളുടെ ജനന നിയന്ത്രണ പദ്ധതി കേന്ദ്രസര്‍ക്കാര്‍ കേരളത്തിനുമേല്‍ അടിച്ചേല്‍പ്പിക്കുകയാണെന്ന് എം.ബി രാജേഷ് പറഞ്ഞു.
തെരുവുനായ്ക്കളെ ആകമാനം കൊന്നൊടുക്കണമെന്ന നിലപാട് കേരളത്തിനില്ല. എന്നാല്‍, ഇവയെ നിയന്ത്രിക്കാന്‍ സംസ്ഥാന സര്‍ക്കാര്‍ നടത്തുന്ന ശ്രമങ്ങളെ ഭീഷണികൊണ്ട് മറികടക്കാനുള്ള ശ്രമം അപലപനീയമാണെന്നും അദ്ദേഹം പറഞ്ഞു. ഏഷ്യന്‍ ദുരന്ത നിവാരണ സെമിനാറില്‍ പങ്കെടുക്കാനായി ഡല്‍ഹിയിലെത്തിയ മുനിസിപ്പാലിറ്റി അധ്യക്ഷന്മാര്‍ പ്രതിഷേധത്തിനുകൂടി സമയം കണ്ടെത്തുകയായിരുന്നു.