തൊടുപുഴ: മൂത്തുറ്റ് ഉപരോധം അക്രമസക്തമായി. മൂത്തുറ്റ് മാനേജര്‍ക്ക് സിപിഎം - സിഐടിയു പ്രവര്‍ത്തകരുടെ ക്രൂരമര്‍ദനം. പൊലിസ് സ്റ്റേഷനിലെത്തിച്ച സി പി എം പ്രവര്‍ത്തകര്‍ക്ക് വന്നതിനെക്കാളും വേഗതയില്‍ സ്‌റ്റേഷനില്‍ നിന്നും ജാമ്യം നല്‍കി വിട്ടയച്ച നടപടി വിവാദമായി. മുത്തൂറ്റ് മങ്ങാട്ടുകവല ശാഖാ മാനേജര്‍ വഴിത്തല മീനംകുന്നേല്‍ സണ്ണിയ്ക്കാണ് (63)  മര്‍ദനമേറ്റത്. ഇദ്ദേഹം തൊടുപുഴ ജില്ലാ ആശുപത്രിയില്‍ ചികിത്സയിലാണ്.
തൊടുപുഴ മാങ്ങാട്ടുകവലയില്‍ പ്രവര്‍ത്തിക്കുന്ന മൂത്തുറ്റ് പാപ്പച്ചന്‍ ഗ്രൂപ്പിന്റെ പണമിടപാട് സ്ഥാപനത്തില്‍ ഇന്നലെ രാവിലെ സി ഐ ടി യു നടത്തിയ ഉപരോധ സമരമാണ് അക്രമത്തില്‍ കലാശിച്ചത്. സംസ്ഥാന വ്യപകമായി സിഐടിയു സംഘടിപ്പിച്ച സമരത്തിന്റെ ഭാഗമായാണ് ഉപരോധ സമരം നടത്തിയത്. രാവിലെ ജോലിക്കെത്തിയ ജീവനക്കാരെ ഓഫീസിനകത്ത് കയറ്റാതെയാണ് സമരം നടത്തിയത്.ഇതിനിടെ സ്ഥാപനത്തിലെ  മാനേജര്‍ കാറിലെത്തി. പുറത്തിറങ്ങിയ ഉടന്‍ തന്നെ പ്രവര്‍ത്തകരുടെ നേതൃത്വത്തില്‍ മര്‍ദനമഴിച്ചുവിടുകയയായിരുന്നു.
മുഖത്തും ശരീരത്തും മര്‍ദനമേറ്റു.  തടസം പിടിക്കാനെത്തിയ പൊലിസുകാരെയും പ്രവര്‍ത്തകര്‍ കൈകാര്യം ചെയ്യാന്‍ ശ്രമിച്ചു. പിന്നീട് പൊലിസ് ഏറെ പരിശ്രമിച്ചാണ് മാനേജരെ പൊലിസ് വാഹനത്തില്‍ കയറ്റിയത്. വാഹനത്തില്‍ കയറ്റുന്നതിനിയും മനേജര്‍ക്കെതിരെ പ്രവര്‍ത്തകര്‍ ഭീഷണി മുഴക്കി. ദൃശ്യങ്ങള്‍ പകര്‍ത്താന്‍ ശ്രമിച്ച സ്‌പെഷല്‍ ബ്രാഞ്ച് ഉദ്യോഗസ്ഥനോട്  മോശമായ രീതിയിലാണ്  പ്രവര്‍ത്തകര്‍ പെരുമാറിയത്.
അക്രമം നടക്കുമെന്ന സൂചന ലഭിച്ചിട്ടും പൊലിസ് കാര്യമായ രീതിയില്‍ സുരക്ഷനല്‍കാന്‍ തയ്യാറായില്ലെന്ന് ആക്ഷേപമുണ്ട്. മര്‍ദനം മൊബൈല്‍ ഫോണില്‍ ചിത്രീകരിക്കാന്‍ ശ്രമിച്ച  യുവാവും പാര്‍ട്ടി പ്രവര്‍ത്തകരുടെ ഭീഷണിയ്ക്ക് ഇരയായി. സംഘര്‍ഷത്തിനിടെ ജീവനക്കാരായ സ്ത്രീകള്‍ ഉള്‍പ്പടെയുള്ളവര്‍ സ്ഥലത്തു നിന്നും ഭയന്നു പിന്‍മാറി.
ഇടവെട്ടിയിലെയും വഴിത്തലയിലേയും ശാഖകള്‍ തുറക്കാന്‍ ആരും എത്തിയില്ല. ആനക്കൂട് കവലയിലെയും മാര്‍ക്കറ്റ് റോഡിലേയും  ശാഖകള്‍ക്ക് മുമ്പില്‍ സിഐടിയു പ്രവര്‍ത്തകര്‍ പ്രതിഷേധവുമായി ഒത്തുചേര്‍ന്നതോടെ അവയും തുറക്കാനായില്ല. ജീവനക്കാരെ അന്യായമായി സ്ഥലം മാറ്റുന്നതില്‍ പ്രതിഷേധിച്ചാണ് സിഐടിയു സമരവുമായി  രംഗത്തിറങ്ങിയത്. കഴിഞ്ഞ ദിവസം സി.ഐ.ടി.യുവും മുത്തൂറ്റ് മാനേജ്‌മെന്റുമായി നടന്ന ചര്‍ച്ച  പരാജയപ്പെട്ടിരുന്നു.