തിരൂര്‍: എസ്.സി.ഇ.ആര്‍.ടി സംഘടിപ്പിച്ച സംസ്ഥാന റോള്‍പ്ലേ മത്സരത്തില്‍ തിരൂര്‍ ഗവ: ഗേള്‍സ് ഹയര്‍സെക്കന്ററി സ്‌കൂളിനു രണ്ടാം സ്ഥാനം. കൗമാരക്കാരായ സ്‌കൂള്‍, കോളജ് വിദ്യാര്‍ഥിനികളെ വഴിതെറ്റിക്കുന്ന ക്ഷുദ്രശക്തികള്‍ക്കെതിരേയും സ്ത്രീകള്‍ക്കെതിരായ ചൂഷണത്തിനെതിരെയുമുള്ള പ്രമേയം ഇംഗ്ലീഷില്‍ അവതരിപ്പിച്ചാണു സ്‌കൂള്‍ രണ്ടാം സ്ഥാനത്തെത്തിയത്.
തിരുവനന്തപുരം തൈക്കാട് ഗാന്ധി സ്മാരകനിധിയില്‍ സംഘടിപ്പിച്ച സംസ്ഥാന റോള്‍ പ്ലേയില്‍ ജില്ലയെ പ്രതിനിധീകരിച്ചാണു തിരൂര്‍ ഗവ: ഗേള്‍സ് മത്സരിച്ചത്. തുടര്‍ച്ചയായി എട്ടാം വര്‍ഷവും ജില്ലയില്‍ ഒന്നാം സ്ഥാനം നേടിയാണ് ടീം സംസ്ഥാന തലത്തില്‍ മത്സരിച്ചത്. വിജയികള്‍ക്കു സര്‍ട്ടിഫിക്കറ്റും കാഷ് പ്രൈസും എസ്.സി.ഇ.ആര്‍.ടി ഡയറക്ടര്‍ ഡോ: ജെ. പ്രസാദ് സമ്മാനിച്ചു.
തിരൂര്‍ ഗേള്‍സിലെ ഒന്‍പതാം തരം വിദ്യാര്‍ഥിനികളായ എം.അരുണിമ, അനാമിക.എസ്.നായര്‍, കെ. മാജിഷ റിസ് വാന, കെ. ഷിറിന്‍, കെ. സ്‌നേഹ ശ്രീനി എന്നിവര്‍ മത്സരത്തില്‍ ജില്ലയെ പ്രതിനിധീകരിച്ചു. ഭിന്നശേഷിയുള്ള വിദ്യാര്‍ഥിയെക്കൂടി പങ്കെടുപ്പിച്ചായിരുന്നു സ്‌കൂളിന്റെ ശ്രദ്ധേയമായ വിജയം.
സ്‌കൂളിലെ ഇംഗ്ലീഷ് അധ്യാപകനായ ജെ.ജയറാമിന്റെ തിരക്കഥയിലും ശിക്ഷണത്തിലുമാണ് എട്ടാം വര്‍ഷവും വിദ്യാര്‍ഥികള്‍ മാറ്റുരച്ചത്. വിജയം സമ്മാനിച്ച അധ്യാപകനെ സ്‌കൂള്‍ പി.ടി.എ അഭിനന്ദിച്ചു.