മണലൂര്‍: ഇന്ന് വിദ്യാര്‍ഥി യൂണിയന്‍ തെരഞ്ഞെടുപ്പ് നടക്കാനിരിക്കേ മണലൂര്‍ ഗവ.ഐ.ടി.ഐയില്‍ സംഘര്‍ഷം ഉടലെടുത്തു. എസ്.എഫ്.ഐ സ്ഥാപിച്ച കൊടികള്‍ നശിപ്പിച്ചുവെന്ന പരാതിയെ തുടര്‍ന്നാണ് സംഘര്‍ഷാവസ്ഥ ഉടലെടുത്തത്. പരാജയം ഉറപ്പിച്ച എതിര്‍കക്ഷികളാണ് ആക്രമണത്തിന് പിറകിലെന്ന ആരോപണവുമായി എസ്.എഫ്.ഐ പ്രവര്‍ത്തകര്‍ പ്രതിഷേധവുമായി തെരുവിലിറങ്ങി. ഇതിനിടയില്‍ എ.ബി.വി.പി, എ.ഐ.എസ്.എഫ് പ്രവര്‍ത്തകര്‍ അവരുടെ കൊടികളും മറ്റും നശിപ്പിച്ചുവെന്ന വാദവുമായി രംഗത്തെത്തി. രംഗം വഷളാകുന്നതായി അറിഞ്ഞ അന്തിക്കാട് എസ്.ഐ പി.എം വിമോദ് ഐ.ടി.ഐയിലെത്തി വിദ്യാര്‍ഥി യൂണിയന്‍ നേതാക്കളെയും അധ്യാപകരെയും വിളിച്ച് വരുത്തി സംസാരിച്ചാണ് സംഘര്‍ഷം ഒഴിവാക്കിയത്. തെരഞ്ഞെടുപ്പിന് ഐ.ടി.ഐ പരിസരത്ത് പൊലിസിന്റെ സാന്നിധ്യം ഉറപ്പാക്കുമെന്നും പ്രശ്‌നങ്ങളില്ലാതെ സമാധാനപൂര്‍ണ്ണമായ അന്തരീക്ഷം ഒരുക്കുമെന്നും, എസ്.ഐ വിമോദ് പറഞ്ഞു.