മാനന്തവാടി: അനധികൃത കൈയേറ്റം ഒഴിപ്പിക്കലിലെ വിവേചനം ആരോപിച്ച് സി.പി.ഐ നടത്തിയ നഗരസഭാ മാര്‍ച്ച് സി.പി.എം തടഞ്ഞതിനെ തുടര്‍ന്ന് പ്രശ്‌നത്തില്‍ ഇടപെട്ട പൊലിസ് ഉദ്യോഗസ്ഥരെ അക്രമിച്ച സംഭവത്തില്‍ സി.പി.എം-ഡി.വൈ.എഫ്.ഐ പ്രവര്‍ത്തകരായ എട്ട് പേരെക്കൂടി പൊലിസ് അറസ്റ്റ് ചെയ്തു. സി.പി.എം ലോക്കല്‍ സെക്രട്ടറി മനോജ് പട്ടേട്ട്, സി.പി മുഹമ്മദലി, ജെയിംസ് വര്‍ഗീസ്, ഷൈജു ചൂട്ടക്കടവ്, വൈശാഖ് മോഹനന്‍, എരുമത്തരുവ് അനില്‍കുമാര്‍, അന്‍വര്‍ സാദിഖ്, തോണിച്ചാല്‍ ഷിജോ എന്നിവരെയാണ് ഇന്നലെ അറസ്റ്റ് ചെയ്തത്.
ഇതേ കേസില്‍ പ്രതികളായ മറ്റ് മൂന്ന് പേരെ കഴിഞ്ഞദിവസം അറസ്റ്റ് ചെയ്തിരുന്നു. ഇവര്‍ റിമാന്‍ഡില്‍ കഴിയുകയാണ്. ആക്രമണത്തിനിടെ പരുക്കേറ്റ് ജില്ലാ ആശുപത്രിയില്‍ ചികിത്സയില്‍ കഴിയുന്ന സി.പി.എം പ്രവര്‍ത്തകന്‍ രാജേഷ്, കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുന്ന അജിത് വര്‍ഗീസ് എന്നിവര്‍ പൊലിസ് കാവലിലാണ്.