കോഴിക്കോട്: മുത്വലാഖ് സ്ത്രീ വിരുദ്ധമാണെന്ന അഭിപ്രായമില്ലെന്നും ഇത്തരം വിഷയത്തില്‍ അഭിപ്രായം പറയേണ്ടത് പണ്ഡിതന്മാരാണെന്നും അത് വിശ്വാസത്തിന്റെ ഭാഗമാണെന്നും മുസ്‌ലിം യൂത്ത്‌ലീഗ് സംസ്ഥാന പ്രസിഡന്റ് പി.എം സാദിഖലി പറഞ്ഞു. വിവാഹമോചന അവകാശങ്ങള്‍ ദുരുപയോഗം ചെയ്യപ്പെടുന്നതിനെ തടയണം. എന്നാല്‍ അതു വ്യാപകമാണെന്ന പ്രചാരണമാണ് നടക്കുന്നത്.
ഇത്തരം മതപരവും വിശ്വാസ പരവുമായ കാര്യങ്ങളില്‍ യൂത്ത്‌ലീഗ് അഭിപ്രായം പറയാറില്ല. മുത്വലാഖ് നിരോധിക്കണമെന്ന് പ്രധാനമന്ത്രി നരേന്ദ്ര മോദിയും മറ്റു കേന്ദ്രമന്ത്രിമാരും ആവശ്യപ്പെട്ടപ്പോള്‍ അതിനെ അനുകൂലിച്ച് കെ.ടി. ജലീല്‍ നടത്തിയ പ്രസ്താവന കേരളീയ സമൂഹത്തെ ഞെട്ടിക്കുന്നതായിരുന്നു. പ്രധാനമന്ത്രിയുടെയും കേന്ദ്രമന്ത്രിമാരുള്‍പ്പെടെയുള്ള ബി.ജെ.പി നേതാക്കളുടെയും മുസ്‌ലിം വിരുദ്ധ നിലപാടിനെ അനുകൂലിച്ച ഏക സംസ്ഥാന മന്ത്രിയാണ് കെ.ടി. ജലീല്‍. ഇത് ശരീഅത്ത് വിഷയത്തില്‍ സി.പി.എം സ്വീകരിച്ചിരുന്ന മുസ്‌ലിം വിരുദ്ധ നിലപാട് ഇപ്പോഴും തുടരുന്നുവെന്നതാണ് വ്യക്തമാക്കുന്നത്. മുത്വലാഖ് നിയമം മൂലം നിരോധിക്കാനാവില്ല. മുത്വലാഖ് ഉള്‍പ്പെടെയുള്ള മതപരമായ കാര്യങ്ങളില്‍ അഭിപ്രായം പറയേണ്ടത് പണ്ഡിതന്മാരാണ്.
മുസ്‌ലിം സ്ത്രീകളുടെ കാര്യത്തില്‍ ആകുലപ്പെടുന്ന നരേന്ദ്ര മോദി സ്വന്തം ഭാര്യയെ കൂട്ടിക്കൊണ്ടുവരാനാണ് ആദ്യം തയാറാകേണ്ടത്. ദലിത്, മുസ്‌ലിം ഐക്യം തകര്‍ക്കുന്നതിനാണ് ഏക സിവില്‍കോഡ് നടപ്പാക്കുന്നതിന് കേന്ദ്ര സര്‍ക്കാര്‍ ശ്രമിക്കുന്നതെന്നും സാദിഖലി പറഞ്ഞു. മോദിക്കും പിണറായിക്കും ഒരു പോലെ ഇഷ്ടപ്പെട്ട മുല്ലമാര്‍ ഉണ്ടാകുന്നുണ്ട്. അവര്‍ ആരാണെന്ന പത്രക്കാരുടെ ചോദ്യത്തിന് കാന്തപുരമാണെന്നായിരുന്നു സാദിഖലിയുടെ മറുപടി.
ഒരു ഭാഗത്ത് മോദിയെയും മറുഭാഗത്ത് പിണറായിയെയും പ്രീണിപ്പിക്കാന്‍ അവര്‍ക്ക് കഴിയുന്നു. സംഘ്പരിവാര്‍ സംഘടിപ്പിച്ച സൂഫി സമ്മേളനത്തില്‍ പങ്കെടുത്ത കാന്തപുരത്തെ,സി.പി.എം തള്ളിപ്പറയാതിരിക്കുന്നത് അവരുടെ ഫാസിസത്തിനെതിരായ നിലപാടിലെ ഇരട്ടത്താപ്പാണ് വ്യക്തമാക്കുന്നതെന്ന് ജനറല്‍ സെക്രട്ടറി സി.കെ സുബൈറും പറഞ്ഞു.