തേഞ്ഞിപ്പലം: ദേശീയപാത ചേളാരിയില്‍ ബസ് ബൈക്കിലിടിച്ചു ബൈക്ക് യാത്രികനായ യുവാവിനു പരുക്കേറ്റു. ഗൂഡല്ലൂര്‍ സ്വദേശിയും മേലെചേളാരിയിലെ സ്വകാര്യ സൂപ്പര്‍ മാര്‍ക്കറ്റിലെ ജീവനക്കാരനുമായ സൈഫുദ്ദീനാ (20) ണ് പരുക്കേറ്റത്. പരുക്കേറ്റ യുവാവിനെ തിരൂരങ്ങാടി താലൂക്കാശുപത്രിയില്‍ ചികിത്സയ്ക്കു വിധേയമാക്കി. പരുക്ക് ഗുരുതരമല്ല.
ഇന്നലെ ഉച്ചയ്ക്ക് ഒന്നരയോടെ ദേശീയപാത ചേളാരി പി.ഡബ്ലിയു.ഡി ഓഫിസിനു മുന്നില്‍വച്ചായിരുന്നു അപകടം. കോഴിക്കോട്-തൃശൂര്‍ റൂട്ടിലോടുന്ന സ്വകാര്യ ബസാണ് സ്‌കൂട്ടറിലിടിച്ചത്. ഇടിയുടെ ആഘാതത്തില്‍ ബൈക്ക് യാത്രികന്‍ തെറിച്ചുവീണെങ്കിലും നിസാര പരുക്കുകളോടെ രക്ഷപ്പെട്ടു. ബൈക്കിനു ഭാഗികമായ കേടുപാടുകള്‍ സംഭവിച്ചിട്ടുണ്ട്. അതേസമയം, പരുക്കേറ്റയാളെ ആശുപത്രിയിലെത്തിക്കാതെ ബസ് ജീവനക്കാര്‍ വാഹനത്തില്‍നിന്ന് ഇറങ്ങിയോടിയതു പ്രതിഷേധത്തിനിടയാക്കി. തുടര്‍ന്നു നാട്ടുകാര്‍ ബസിന്റെ മുന്‍ഭാഗത്തെ ഇരു ചക്രങ്ങളുടെയും കാറ്റൊഴിച്ചു.