കോട്ടക്കല്‍: കെ.എസ്.ആര്‍.ടി.സി സര്‍വിസ് ആരംഭിക്കുമെന്ന് അറിയിച്ച കോട്ടക്കല്‍-പെരിന്തല്‍മണ്ണ റൂട്ടില്‍ ഇതുവരെയും പദ്ധതി നടപ്പായില്ലെന്ന് പരാതി. മാസങ്ങള്‍ക്ക് മുന്‍പ് ഗതാഗതമന്ത്രി കോട്ടക്കല്‍ സന്ദര്‍ശിച്ച സമയത്ത് സര്‍വിസ് ആരംഭിക്കുന്നതിന് നടപടി സ്വീകരിക്കുമെന്ന് അറിയിച്ചിരുന്നു. കാലങ്ങളായി ജനങ്ങളുടെ ആവശ്യമാണ് ഈ റൂട്ടിലൂടെയുള്ള കെ.എസ്.ആര്‍.ടി.സി സര്‍വിസ്.
മുന്‍പ് സര്‍വിസ് ആരംഭിച്ചിരുന്നെങ്കിലും പിന്നീട് നിര്‍ത്തിവെക്കുകയായിരുന്നു. മികച്ച കളക്ഷനാണ് അന്ന് കെ.എസ്.ആര്‍.ടി.സി ക്ക് ലഭിച്ചിരുന്നത്. സ്വകാര്യ ബസുകളുടെ മിന്നല്‍ പണിമുടക്കും രാത്രി സമയങ്ങളില്‍ സര്‍വിസ് നിര്‍ത്തിവെക്കുന്നതും യാത്രക്കാരെ പലപ്പോഴും ബുദ്ധിമുട്ടിലാക്കുന്നുണ്ട്.
മന്ത്രിയുടെ വാഗ്ദാനം കഴിഞ്ഞ് മാസങ്ങളായിട്ടും തുടര്‍നടപടികളൊന്നും ഇതുവരെ ഉണ്ടായില്ലെന്നാണ് യാത്രക്കാരുടെ പരാതി.