തൊടുപുഴ: ക്രിസ്തീയ ഭക്തിഗാന രംഗത്ത് നിരവധി സൂപ്പര്‍ഹിറ്റ് ആല്‍ബങ്ങള്‍ ഒരുക്കിയ ജിനോ കുന്നുംപുറത്തിന്റെ 102-ാമത്തെ ആല്‍ബം 'പൈതലി' ന്റെ ഓഡിയോ റിലീസിങ് ശിശുദിനമായ 14ന് വൈകിട്ട് അഞ്ചിന് പൈങ്കുളം മദര്‍ ആന്‍ഡ് ചൈല്‍ഡ് ഓര്‍ഫനേജില്‍ നടക്കും.
പി.ജെ ജോസഫ് എം.എല്‍.എ, സംഗീത സംവിധായകന്‍ എം ജയചന്ദ്രന്‍ എന്നിവര്‍ ചേര്‍ന്ന് ഓഡിയോ റിലീസിങ് നിര്‍വഹിക്കുമെന്ന് നിര്‍മ്മാതാവ് ജിനോ കുന്നുംപുറം വാര്‍ത്താസമ്മേളനത്തില്‍ അറിയിച്ചു. കോട്ടയം ശ്രുതി സ്‌കൂള്‍ ഓഫ് മ്യൂസിക് ഡയറക്ടര്‍ ഫാ. എം.പി ജോര്‍ജ്, തൊടുപുഴ ടൗണ്‍ പള്ളി വികാരി ഫാ. ജോസ് പുല്ലോപ്പിള്ളിക്ക് ആദ്യ കോപ്പി നല്‍കി വില്‍പന നടത്തും. മികച്ച സംഗീത സംവിധായകനുള്ള ദേശീയ അവാര്‍ഡ് നേടിയ എം ജയചന്ദ്രനെ ചടങ്ങില്‍ ആദരിക്കും.
23 കുട്ടികളെ അണിനിരത്തിയാണ് 'പൈതല്‍' ആല്‍ബം ചിത്രീകരിച്ചിരിക്കുന്നത്. മനോജ് ഇലവുങ്കലും ഫാ. മൈക്കിള്‍ പനച്ചിക്കലും ചേര്‍ന്നാണ് ഗാനരചന നിര്‍വഹിച്ചിരിക്കുന്നത്. നെല്‍സണ്‍ പീറ്ററാണ് സംഗീത സംവിധായകന്‍. മദര്‍ ആന്‍ഡ് ചൈല്‍ഡ് ഭാരവാഹി ജോഷി ഓടയ്ക്കലും വാര്‍ത്താസമ്മേളനത്തില്‍ പങ്കെടുത്തു.