കൊല്ലം: കനത്ത മഴയില്‍ ജില്ലയില്‍ ജനജീവിതം ദുസഹമായി. രണ്ടു ദിവസമായി ജില്ലയിലെ പല മേഖലകളിലും തുടര്‍ന്നിരുന്ന മഴ ഇന്നലെയാണ് കനത്തത്. തീരമേഖലയിലും താഴ്ന്ന പ്രദേശങ്ങളിലും മഴ ജനജീവിതത്തെ ബാധിച്ചു. 

മഴക്കൊപ്പമുണ്ടായ കാറ്റില്‍ മരക്കൊമ്പുകള്‍ ഒടിഞ്ഞുവീണു വിവിധ പ്രദേശങ്ങളില്‍ നാശനഷ്ടം ഉണ്ടായിട്ടുണ്ട്. പലയിടത്തും വൈദ്യുതി ലൈന്‍ പൊട്ടിവീണിരുന്നു. ഇതുമൂലം ജല്ലയിലെ പലയിടത്തും വൈദ്യുതി വിതരണം തടസപ്പെട്ടു. മിക്ക സ്ഥലത്തും വൈദ്യുതി പോസ്റ്റുകള്‍ ഒടിഞ്ഞുവീണു അപകടാവസ്ഥയിലാണ്. ജില്ലയുടെ
കിഴക്കന്‍ മേഖലകളില്‍ വൃക്ഷങ്ങള്‍ ഒടിഞ്ഞുവീണു ഗാതാഗതവും തടസപ്പെട്ടു. മരക്കൊമ്പുകള്‍ മുറിച്ചുമാറ്റിയാണ് പല സ്ഥലങ്ങളിലും ഗതാഗതം പുനസ്ഥാപിച്ചത്.
കടല്‍ പ്രക്ഷുബ്ദമായതിനാല്‍ തീരദേശങ്ങളില്‍ കടലാക്രമണ സാധ്യതയും ഏറി. ഇരവിപുരം,താന്നി,കരിത്തുറ,പുത്തന്‍തുറ,അഴീക്കല്‍ എന്നിവിടങ്ങള്‍ കടലാക്രമണ ഭീഷണിയിലാണ്.
അതേസമയം, രണ്ടു ദിവസം കൂടി കനത്ത മഴ തുടരുമെന്നു സൂചന ലഭിച്ചതോടെ ദുരിതാശ്വാസ ക്യാമ്പുകള്‍ ഇന്നു തുടങ്ങിയേക്കും. മണിക്കൂറില്‍ 55 കിലോമീറ്റര്‍ വേഗതയിലുള്ള കാറ്റിനും സാധ്യതയുണ്ട്. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദമാണ് ഇപ്പോഴത്തെ മഴയ്ക്ക് കാരണം. കടല്‍ പ്രക്ഷുബ്ദമായതിനാല്‍ മല്‍സ്യമേഖലയും പട്ടിണിയിലായി. മഴ ശക്തി പ്രാപിച്ചതോടെ നിര്‍മ്മാണ മേഖലയും പ്രതിസന്ധിയിലായി.