മഞ്ചേരി: മഞ്ചേരി മെഡിക്കല്‍ കോളജ് വിദ്യാര്‍ഥി യൂനിയന്‍ മാഗസിന്‍ 'ദ ലെന്‍സ് 'ന്റെ പ്രകാശനവും എക്‌സിബിഷനും 17നു മലപ്പുറം കോട്ടക്കുന്ന് ഡി.ടി.പി.സി ഹാളില്‍ നടക്കും. വൈകിട്ട് മൂന്നിനു സിനിമാ താരം ജോയ്മാത്യു മാഗസിന്‍ പ്രകാശനം നിര്‍വഹിക്കും. മെഡിക്കല്‍ കോളജ് പ്രിന്‍സിപ്പല്‍ ഡോ. കെ. മോഹനന്‍, ആശുപത്രി സുപ്രണ്ട് ഡോ. നന്ദകുമാര്‍ സംബന്ധിക്കും.
ഇതാദ്യമായാണ് മെഡിക്കല്‍ കോളജ് വിദ്യാര്‍ഥി കൂട്ടായ്മ മാഗസിന്‍ പുറത്തിറക്കുന്നത്. കോളജില്‍ പഠനം നടത്തവേ മരണപ്പെട്ട ചിഞ്ജുഷ എന്ന പ്രഥമബാച്ച് വിദ്യാര്‍ഥിനിയുടെ സ്മരണാര്‍ഥമാണ് എക്‌സിബിഷന്‍. 17ന് മെഡിക്കല്‍ കോളജ് വിദ്യാര്‍ഥികള്‍, അധ്യാപകര്‍, ജീനക്കാര്‍, 18, 19 തിയതികളില്‍ മലപ്പുറത്തെ വിദ്യാര്‍ഥികള്‍, കലാകാരന്മാര്‍ തുടങ്ങിയവര്‍ക്ക് എക്‌സിബിഷന്‍ കാണുന്നതിനു സൗകര്യമൊരുക്കും.
എ.എസ് കെ.സി സ്റ്റഡുഡന്റ് എഡിറ്ററും ഡോ. സീനാ സുകുമാര്‍ സ്റ്റാഫ് എഡിറ്ററുമായ സമിതിയാണ് മാഗസിന്റെ ചുമതലവഹിക്കുന്നത്. വാര്‍ത്താസമ്മേളനത്തില്‍ എന്‍. വിനായക്, മിന്നാബസാനിയ തുടങ്ങിയവര്‍ പങ്കെടുത്തു.