പത്തനംതിട്ട: വ്രതശുദ്ധിയുടെ വൃശ്ചികം പിറന്നതോടെ ശബരിമലയിലേക്കു ഭക്തരുടെ ഒഴുക്ക്. ഇന്നലെ പുലര്‍ച്ചെ മൂന്നിന് ശബരിമല ക്ഷേത്രനട തുറന്നു. പുതിയ മേല്‍ശാന്തി ടി.കെ. ഉണ്ണിക്കൃഷ്ണന്‍ നമ്പൂതിരിയാണ് നട തുറന്നത്. തീര്‍ഥാടന കാലത്തിന് തുടക്കം കുറിച്ച് മഹാഗണപതി ഹോമം നടത്തി. തന്ത്രി കണ്ഠര് രാജീവര് കാര്‍മ്മികത്വം വഹിച്ചു. പുലര്‍ച്ചെ 3.15-ന് ആദ്യ നെയ്യഭിഷേകം ആരംഭിച്ചു. രാവിലെ 11.30 വരെ നെയ്യഭിഷേകം നടന്നു. വൈകിട്ട് മൂന്നിന് വീണ്ടും നട തുറന്നു. ദീപാരാധനയ്ക്ക് ശേഷം ഹരിവരാസനം പാടി രാത്രി 10.30ന് നട അടച്ചു. മാളികപ്പുറത്ത് പുതിയ മേല്‍ശാന്തി മനു നമ്പൂതിരി നട തുറന്നു. ദേവസ്വംമന്ത്രി കടകംപള്ളി സുരേന്ദ്രന്‍, ദേവസ്വം ബോര്‍ഡ് പ്രസിഡന്റ് പ്രയാര്‍ ഗോപാലകൃഷ്ണന്‍ തുടങ്ങിയവര്‍ എത്തിയിരുന്നു.
ഡിസംബര്‍ 26നാണ് മണ്ഡലപൂജ. അന്ന് രാത്രി 11ന് നട അടയ്ക്കുന്നതോടെ മണ്ഡലകാലത്തിന് സമാപനം ആകും. മകരവിളക്ക് ഉത്സവത്തിനായി ഡിസംബര്‍ 30ന് നട തുറക്കും. ജനുവരി 14നാണ് മകരവിളക്ക്.