ന്യൂഡല്‍ഹി: നോട്ട് അസാധുവാക്കലിനെ തുടര്‍ന്ന് കേരളത്തിലെ സഹകരണ ബാങ്കുകള്‍ നേരിടുന്ന പ്രതിസന്ധി പാര്‍ലമെന്റിന്റെ ഇരുസഭകളിലും ഉന്നയിക്കാന്‍ മുഖ്യമന്ത്രി പിണറായി വിജയന്‍ വിളിച്ചുചേര്‍ത്ത സംസ്ഥാനത്തെ എം.പിമാരുടെ യോഗത്തില്‍ ധാരണ.
പിന്‍വലിച്ച നോട്ടുകളുടെ ഇടപാടു നടത്താന്‍ സഹകരണ ബാങ്കുകളെ അനുവദിക്കാത്ത കേന്ദ്രസര്‍ക്കാര്‍ നടപടിക്കെതിരേ ഒറ്റക്കെട്ടായി പോരാടാനും യോഗത്തില്‍ തീരുമാനമായി. ഇതിന്റെ ഭാഗമായി എം.പിമാര്‍ പ്രധാനമന്ത്രിയെയും കേന്ദ്ര ധനകാര്യമന്ത്രിയെയും കാണും. ഇക്കാര്യം പാര്‍ലമെന്റിനുള്ളിലും പുറത്തും ഉന്നയിക്കുമെന്ന് യോഗത്തിന് ശേഷം എം.പിമാരായ പി. കരുണാകരന്‍, കൊടിക്കുന്നില്‍ സുരേഷ്, ആന്റോ ആന്റണി എന്നിവര്‍ മാധ്യമങ്ങളോട് പറഞ്ഞു.
കഴിഞ്ഞദിവസം നടന്ന കോണ്‍ഗ്രസ് പാര്‍ലമെന്ററി പാര്‍ട്ടി യോഗത്തിനിടെ ഇക്കാര്യം പാര്‍ട്ടി അധ്യക്ഷ സോണിയാഗാന്ധിയുടെ ശ്രദ്ധയില്‍പെടുത്തിയതായി കൊടിക്കുന്നില്‍ പറഞ്ഞു. മുഖ്യമന്ത്രി വിളിച്ചു ചേര്‍ത്ത യോഗത്തിലേക്ക് ക്ഷണിക്കാത്തതില്‍ പ്രതിഷേധവുമായി സുരേഷ് ഗോപി എം.പി എത്തി. തന്നെ യോഗത്തിലേക്ക് ക്ഷണിക്കാത്ത നടപടിയില്‍ പ്രതിഷേധമറിയിക്കാനെത്തിയ സുരേഷ് ഗോപിയെ മറ്റു എം.പിമാര്‍ അനുനയിപ്പിക്കുകയായിരുന്നു.
പിന്നീട് മുഖ്യമന്ത്രിയുമായി സുരേഷ് ഗോപി പ്രത്യേകം ചര്‍ച്ച നടത്തി. യോഗത്തിലേക്ക് ആംഗ്ലോ ഇന്ത്യന്‍ പ്രതിനിധി റിച്ചാര്‍ഡ് ഹെയെയും ക്ഷണിച്ചിരുന്നില്ല.