ന്യൂഡല്‍ഹി: ഗുജറാത്ത്, ഉത്തര്‍പ്രദേശ്, തെലങ്കാന, ജാര്‍ഖണ്ഡ്, മേഘാലയ സംസ്ഥാനങ്ങളിലെ വിവിധ നിയമസഭാ മണ്ഡലങ്ങളില്‍ നടന്ന ഉപ തെരഞ്ഞെടുപ്പില്‍ കോണ്‍ഗ്രസിനു തിരിച്ചടി.
ഗുജറാത്തിലെ തലാല നിയോജക മണ്ഡലം കോണ്‍ഗ്രസില്‍ നിന്നു ബി.ജെ.പി തിരിച്ചുപിടിച്ചു. ബി.ജെ.പി സ്ഥാനാര്‍ഥി ഗോവിന്ദ് പാര്‍മര്‍ 2,440 വോട്ടുകള്‍ക്ക് കോണ്‍ഗ്രസിലെ ഭഗവന്‍ജി ബരഡിനെ പരാജയപ്പെടുത്തി.
തെലങ്കാനയിലെ പലൈര്‍ നിയോജക മണ്ഡലത്തില്‍ ഉപ തെരഞ്ഞെടുപ്പില്‍ ഭരണ കക്ഷിയായ തെലങ്കാന രാഷ്ട്ര സമിതി കോണ്‍ഗ്രസിനെ വീഴ്ത്തി വിജയം പിടിച്ചു. ടി.ആര്‍.എസിന്റെ തുമ്മല നാഗേശ്വര റാവു 94,940 വോട്ടുകള്‍ പിടിച്ചാണ് വിജയിച്ചത്. കോണ്‍ഗ്രസ് സ്ഥാനാര്‍ഥി സുചരിത റെഡ്ഡിക്ക് 49,258 വോട്ടുകളാണ് നേടാന്‍ സാധിച്ചത്.
മേഘാലയയിലെ ടുറ മണ്ഡലത്തിലേക്ക് നടന്ന ഉപ തെരഞ്ഞെടുപ്പില്‍ ഭരണ കക്ഷിയായ കോണ്‍ഗ്രസിന്റെ സ്ഥാനാര്‍ഥിക്ക് രണ്ടു ലക്ഷം വോട്ടുകളുടെ കനത്ത തോല്‍വി. നാഷനല്‍ പീപ്പിള്‍സ് പാര്‍ട്ടി നേതാവ് കൊണാര്‍ഡ് കെ സാഗ്മയാണ് ഇവിടെ വിജയിച്ചത്. മുഖ്യമന്ത്രി മുകുള്‍ സാഗ്മയുടെ ഭാര്യ ദിഖഞ്ചി ഡി ഷിറയാണ് പരാജയം ഏറ്റുവാങ്ങിയത്.

ഉത്തര്‍പ്രദേശിലെ ബിലരി, ജാന്‍കിപുര്‍ മണ്ഡലങ്ങളില്‍ നടന്ന ഉപ തെരഞ്ഞെടുപ്പില്‍ ഭരണ കക്ഷിയായ സമാജ്‌വാദി പാര്‍ട്ടി സീറ്റ് നിലനിര്‍ത്തി. ബിലരിയില്‍ എസ്.പി സ്ഥാനാര്‍ഥി മുഹമ്മദ് ഫഹിം 7,063 വോട്ടുകള്‍ക്ക് ബി.ജെ.പി സ്ഥാനാര്‍ഥി സുരേഷ് സൈനിയെ പരാജയപ്പെടുത്തി. ജാന്‍കിപുരില്‍ എസ്.പിയുടെ കിസ്മതി ദേവി 22,092 വോട്ടുകള്‍ക്ക് ബി.ജെ.പിയുടെ രമേഷ് സിങിനെയാണ് വീഴ്ത്തിയത്.

ജാര്‍ഖണ്ഡിലെ രണ്ടു അസംബ്ലി മണ്ഡലങ്ങളില്‍ നടന്ന ഉപ തെരഞ്ഞെടുപ്പില്‍ ബി.ജെ.പി, കോണ്‍ഗ്രസ് കക്ഷികള്‍ സിറ്റിങ് സീറ്റി നിലനിര്‍ത്തി. ഉപ തെരഞ്ഞെടുപ്പ് നടന്ന ഗോഡ്ഡയില്‍ ബി.ജെ.പിയും പാന്‍കിയില്‍ കോണ്‍ഗ്രസുമാണ് സീറ്റ് നിലനിര്‍ത്തിയത്. ഗോഡ്ഡയില്‍ ബി.ജെ.പി സ്ഥാനാര്‍ഥി അമിത് മണ്ഡല്‍ 34,551 വോട്ടുകള്‍ക്ക് ആര്‍.ജെ.ഡിയിലെ സഞ്ജയ് യാദവിനെയാണ് പരാജയപ്പെടുത്തിയത്. പാന്‍കിയില്‍ കോണ്‍ഗ്രസ് സ്ഥാനാര്‍ഥി ദേവേന്ദ്ര കുമാര്‍ സിങ് 3,558 വോട്ടുകള്‍ക്ക് ജാര്‍ഖണ്ഡ് മുക്തി മോര്‍ച്ച സ്ഥാനാര്‍ഥി കുഷ്‌വാഹ ശശിഭൂഷന്‍ മെഹ്തയെ പരാജയപ്പെടുത്തി.