ആലപ്പുഴ: ഉത്തര്‍ പ്രദേശിനെതിരായ കൂച്ച് ബിഹാര്‍ ട്രോഫിയില്‍ കേരളത്തിനു തോല്‍വി. 330 റണ്‍സിന്റെ കൂറ്റന്‍ വിജയമാണ് നിലവിലെ ചാംപ്യന്‍മാരായ ഉത്തര്‍ പ്രദേശ് സ്വന്തമാക്കിയത്.
രണ്ടിന്നിങ്‌സിലും കേരളത്തിന്റെ ബാറ്റിങ് നിര അമ്പേ പരാജയപ്പെട്ടു. ആദ്യ ഇന്നിങ്‌സില്‍ ഉത്തര്‍ പ്രദേശ് 240 റണ്‍സെടുത്തപ്പോള്‍ കേരളത്തിന്റെ പോരാട്ടം വെറും 70 റണ്‍സില്‍ അവസാനിച്ചു. 170 റണ്‍സ് ലീഡ് സ്വന്തമാക്കി രണ്ടാം ഇന്നിങ്‌സ് ആരംഭിച്ച ഉത്തര്‍ പ്രദേശ് എട്ടു വിക്കറ്റിനു 287 റണ്‍സെടുത്തു ഡിക്ലയര്‍ ചെയ്ത് 457 റണ്‍സിന്റെ കൂറ്റന്‍ വിജയ ലക്ഷ്യം മുന്നില്‍ വച്ചു. കേരളത്തിന്റെ ചെറുത്തു നില്‍പ്പ് 127 റണ്‍സില്‍ അവസാനിപ്പിച്ചാണ് യു.പി മികച്ച വിജയം സ്വന്തമാക്കിയത്. 57 റണ്‍സെടുത്ത ഡാരിയല്‍ എസ് ഫെരാരിയോയാണ് കേരളത്തിന്റെ ടോപ് സ്‌കോറര്‍. രോഹന്‍ കുന്നുമ്മല്‍ (21), അശ്വിന്‍ ആനന്ദ് (18), അഖില്‍ അനില്‍ (16) എന്നിവരും രണ്ടക്കം കടന്നു. യു.പിക്കായി ഹര്‍ഷവര്‍ധന്‍ രണ്ടാം ഇന്നിങ്‌സില്‍ അഞ്ചു വിക്കറ്റുകള്‍ പിഴുതു.