പൊന്നാനി: 2022ലെ ലോകകപ്പ് ചുമതല വഹിക്കുന്ന സുപ്രിം കമ്മിറ്റി ഫോര്‍ ഡെലിവറി ആന്‍ഡ് ലെഗസിയും യൂത്ത് ഹോബീസ് സെന്ററും ചേര്‍ന്നു നടത്തിയ കായിക ഫോട്ടോഗ്രാഫി മത്സരത്തില്‍ ഒന്നാംസ്ഥാനം മലയാളിയായ  എ.കെ ബിജുരാജിന്. പതിനായിരം റിയാലും (ഒരുലക്ഷത്തി എണ്‍പത്തിനാലായിരം ഇന്ത്യന്‍ രൂപ) സുപ്രിംകമ്മിറ്റിയുടെ മൊമെന്റോയും അടങ്ങുന്നതാണ് പുരസ്‌കാരം.
2015ലെ ഐ.പി.സി. അത്‌ലറ്റിക് ലോക ചാംപ്യന്‍ഷിപ്പില്‍ പുരുഷന്മാരുടെ ലോങ് ജംപ് ടി42 ഫൈനല്‍ മത്സരത്തിനിടെ പകര്‍ത്തിയ അമേരിക്കയുടെ റീഗാസ് വുഡ്‌സിന്റെ ചിത്രത്തിനാണ് ഒന്നാംസ്ഥാനം ലഭിച്ചത്. രണ്ടാം സ്ഥാനം ഖത്തറി ഫോട്ടോഗ്രാഫറായ അഹമ്മദ് അല്‍ഷാഫിക്കും മൂന്നാംസ്ഥാനം ലെബനാന്‍ ഫോട്ടോഗ്രാഫറായ മുഹമ്മദ് ദബൂസിനുമാണ് ലഭിച്ചത്. ഖത്തറിലേതുള്‍പ്പെടെ അന്താരാഷ്ട്ര തലത്തിലുള്ള 90ഓളം ഫോട്ടോഗ്രാഫര്‍മാരുടെ 450 ഓളം കായിക ചിത്രങ്ങളില്‍ നിന്നാണു ബിജുരാജിന്റെ ചിത്രം ഒന്നാമതെത്തിയത്.
ദോഹയിലെ സ്‌പോര്‍ട്‌സ് മാഗസിനായ ദോഹ സ്റ്റേഡിയം മാഗസിന്റെ ഫോട്ടോഗ്രാഫറാണ് എ.കെ ബിജുരാജ്. കണ്ണൂര്‍ കൊയ്യം സ്വദേശിയാണ്. ബോബിയാണ് ഭാര്യ. ബിര്‍ള പബ്ലിക് സ്‌കൂളിലെ നാലാംക്ലാസ് വിദ്യാര്‍ഥിനിയായ ദിയ മകളാണ്.