കണ്ണൂര്‍: സീനിയര്‍ ഗേള്‍സ് ഷോട്ട്പുട്ടില്‍ സ്വന്തം റെക്കോര്‍ഡ് തിരുത്തി ഗവ.ഗേള്‍സ് ഹയര്‍ സെക്കന്‍ഡറി സ്‌കൂളിലെ വി.വി അര്‍ഷാന. കഴിഞ്ഞ വര്‍ഷം സ്ഥാപിച്ച 9.17 മീറ്റര്‍ 9.19 മീറ്ററാക്കി തിരുത്തിയാണ് അര്‍ഷാന മികവു കാട്ടിയത്. മാതമംഗലം കടുക്കാരം സ്വദേശിനിയായ അര്‍ഷാന തുടര്‍ച്ചയായ അഞ്ചാം വര്‍ഷമാണ് ഷോര്‍ട്ട്പുട്ടില്‍ ഒന്നാം സ്ഥാനം നേടുന്നത്. കഴിഞ്ഞ വര്‍ഷം സംസ്ഥാന തലത്തില്‍ നാലാം സ്ഥാനം നേടിയിരുന്നു. ഹാമര്‍ ത്രോയില്‍ കഴിഞ്ഞ തവണ 32.25 മീറ്റര്‍ ദൂരം എറിഞ്ഞു റെക്കോര്‍ഡ് സ്ഥാപിച്ച പ്ലസ് ടു വിദ്യാര്‍ഥിനിയായ അര്‍ഷാന ഇക്കുറി റെക്കോര്‍ഡ് തിരുത്താനാകുമെന്ന പ്രതീക്ഷയിലാണ്.

പോള്‍വാള്‍ട്ടില്‍ സോണിയയുടെ സ്വര്‍ണച്ചാട്ടം

കണ്ണൂര്‍: സ്‌പോര്‍ട്‌സ് സെലക്ഷനിലൂടെ ഗവ. ഗേള്‍സ് ഹയര്‍ സെക്കന്‍ഡറി സ്‌കൂളില്‍ പഠനത്തിനെത്തുമ്പോള്‍ പി.കെ സോണിയയുടെ ഇഷ്ട ഇനം ട്രിപ്പിള്‍ ജംപായിരുന്നു. സ്‌പോര്‍ട്‌സ് സ്‌കൂളിലെത്തിയതോടെ കോച്ച് ലിജോയാണ് സോണിയയുടെ മികവ് പോള്‍വാള്‍ട്ടിലാണെന്ന് പറഞ്ഞത്. ഒടുവില്‍ സോണിയക്ക് ജില്ലാ സ്‌കൂള്‍ കായികമേളയില്‍ റെക്കോര്‍ഡിന്റെ തങ്കത്തിളക്കം. രണ്ടു മീറ്റര്‍ ഉയരത്തില്‍ ആരും ചാടാത്തതിനാല്‍ ജില്ലാ സ്‌കൂള്‍ കായികമേളയില്‍ ഈ ഇനത്തില്‍ റെക്കോര്‍ഡ് ബുക്കില്‍ ആരുടെയും പേരുണ്ടായിരുന്നില്ല. 2.40 മീറ്റര്‍ ചാടി സോണിയ ആ കുറവു തീര്‍ത്തു. ഇക്കുറി പോള്‍വാള്‍ട്ടില്‍ മാത്രം മത്സരിച്ചാല്‍ മതിയെന്ന് കോച്ച് പറഞ്ഞതിനെ തുടര്‍ന്ന് മത്സരിക്കുമ്പോഴും അതു റെക്കോര്‍ഡിലേക്കുള്ള കുതിപ്പാവുമെന്ന് കരുതിയില്ലെന്ന് സാണി പറഞ്ഞു. കിനാനൂര്‍-കരിന്തളത്തെ ടാപ്പിങ് തൊഴിലാളി അശോകന്റെയും അനിഷയുടെ മൂത്തമകളാണ് സോണിയ. നീലേശ്വരം സെന്റ് മേരീസ് ഗേള്‍സ് ഹയര്‍ സെക്കന്‍ഡറിയില്‍ പഠിക്കുന്ന അഞ്ജലി സഹോദരിയാണ്.