പഴയങ്ങാടി: പഴയങ്ങാടി ബസ് സ്റ്റാന്റില്‍ തെരുവുനായ്ക്കളുടെ ശല്യം രൂക്ഷം. കച്ചവടകേന്ദ്രങ്ങളില്‍ നിന്നു വലിച്ചെറിയുന്ന ഭക്ഷണാവശിഷ്ടങ്ങള്‍ തേടിയാണ് നായ്ക്കള്‍ സ്റ്റാന്റിലെത്തുന്നത്.
വിശ്രമകേന്ദ്രത്തിനു മുന്നിലും ടൂറിസ്റ്റ് ഫെസിലിറ്റി സെന്ററിന്റെ വരാന്തയിലുമാണു നായ്ക്കളുടെ സ്ഥിരവാസം. ചെറിയ മഴ ചാറുമ്പോള്‍ തെരുവു നായ്ക്കള്‍ കൂട്ടമായി ഇവിടെ എത്തിച്ചേരുകയാണ്. കഴിഞ്ഞദിവസം ഒരു സ്‌കൂള്‍ വിദ്യാര്‍ഥി തെരുവുനായ്ക്കളുടെ ആക്രമണത്തില്‍ നിന്നു തലനാരിഴയ്ക്കാണ് രക്ഷപ്പെട്ടത്. പഞ്ചായത്ത് അധികൃതര്‍ക്ക് നിരവധി തവണ പരാതി നല്‍കിയിട്ടും നടപടിയില്ലാത്തതിനാല്‍ പ്രദേശത്ത് പ്രതിഷേധം ശക്തമാണ്.