കോട്ടയം: ജില്ലയിലെ എല്ലാ തദ്ദേശഭരണ സ്ഥാപനങ്ങളുടെയും അധ്യക്ഷന്‍മാര്‍ക്കും സെക്രട്ടറിമാര്‍ക്കും ബന്ധപ്പെട്ട ജില്ലാതല ഉദ്യോഗസ്ഥര്‍ക്കുമായി ശില്‍പശാല സംഘടിപ്പിച്ചു.സംസ്ഥാന സര്‍ക്കാര്‍ നടപ്പാക്കുന്ന നവകേരള മിഷന്റെ പദ്ധതിയുടെ ഭാഗമായാണ് ശില്‍പശാല. ജില്ലാ പഞ്ചായത്ത് ഹാളില്‍ നടന്ന ശില്പശാല ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ് അധ്യക്ഷനായി. ജില്ലാ കളക്ടര്‍ സി.എ ലത മുഖ്യ പ്രഭാഷണം നടത്തി. ജില്ലാ പ്ലാനിംഗ് ഓഫീസര്‍ കെ.എസ്. ലതിയുടെ നേതൃത്വത്തില്‍ വിവിധ മിഷനുകളെ സംബന്ധിച്ചുളള വിഷയാവതരണം നടത്തി.
ഡിസംബര്‍ എട്ടിന് നടത്തേണ്ട ഏകദിന ഗൃഹതല ശുചിത്വ സര്‍വ്വേയ്ക്കായി വിദ്യാഭ്യാസ വകുപ്പും കുടുംബശ്രീ മിഷനും തദ്ദേശസ്വയംഭരണ സ്ഥാപനങ്ങളും കൂടിയാലോചിച്ച് വേണ്ട ക്രമീകരണങ്ങള്‍ നടത്തണമെന്നും അതോടൊപ്പം കൃഷിവകുപ്പ്, ദാരിദ്ര്യ ലഘൂകരണ വിഭാഗവും കുടുംബശ്രീ മിഷനുമായി ഏകോപിച്ച് പ്രവര്‍ത്തിച്ചുകൊണ്ട് ജില്ലയിലെ തരിശുനിലങ്ങളില്‍ കൃഷി തുടങ്ങുന്നതിനുള്ള നടപടികള്‍ സ്വീകരിക്കേണ്ടതാണെന്നും യോഗം നിര്‍ദ്ദേശിച്ചു.
ഓരോ തദ്ദേശഭരണ സ്ഥാപനവും ഡിസംബര്‍ എട്ടിന് ശുചിത്വ സര്‍വ്വേ പൂര്‍ത്തിയാക്കുന്നതിനും നവകേരള മിഷന്‍ പ്രകാരം നടപ്പാക്കാവുന്ന മറ്റ് പ്രവര്‍ത്തികളുടെ ആക്ഷന്‍ പ്ലാന്‍ തയ്യാറാക്കുന്നതിനുമായി 26 നകം ബന്ധപ്പെട്ട വകുപ്പുദ്യോഗസ്ഥരുടെ യോഗം വിളിച്ചുകൂട്ടണം.