കുവൈത്ത് സിറ്റി: കുവൈത്തില്‍ 15ാം പാര്‍ലമെന്റ് തെരഞ്ഞെടുപ്പ് ഇന്ന് നടക്കും. പരസ്യപ്രചാരണം ഇന്നലെ അവസാനിച്ചിരുന്നു. 287 പേരാണ് മത്സരരംഗത്തുള്ളത്. പത്രികസമര്‍പ്പണം അവസാനിച്ചപ്പോള്‍ 455 പേരാണ് മത്സരംഗത്തുണ്ടായിരുന്നത്. സൂക്ഷ്മ പരിശോധനയില്‍ രാജകുടുംബത്തിന്റേതുള്‍പ്പെടെയുള്ളവരുടെ പത്രികകള്‍ തള്ളി. 128 പേര്‍ സ്വയം പത്രിക പിന്‍വലിച്ചു. 40 പേരുടെ പത്രികകളാണ് തള്ളിയത്. മുന്‍ പാര്‍ലമെന്റ് അംഗങ്ങളായ അബ്ദുല്‍ ഹമീദ് ദശ്തി, ഹാനി ഹുസൈന്‍, സഫാഹ് അല്‍ ഹാഷിം തുടങ്ങിയ പ്രമുഖരും പത്രിക തള്ളപ്പെട്ടവരില്‍ പെടും. ആകെ അഞ്ചു മണ്ഡലങ്ങളാണുള്ളത്. ഓരോ മണ്ഡലത്തില്‍നിന്നും 10 പേര്‍ തെരഞ്ഞെടുക്കപ്പെടും. തെരഞ്ഞെടുപ്പ് റിപ്പോര്‍ട്ട് ചെയ്യാന്‍ 75 തെരഞ്ഞെടുപ്പ് നിരീക്ഷകര്‍ ഉള്‍പ്പെടെ 150ഓളം വിദേശമാധ്യമ പ്രവര്‍ത്തകര്‍ക്ക് അനുമതി നല്‍കിയിട്ടുണ്ട്.