വടക്കഞ്ചേരി: തരൂരില്‍ എ.കെ ബാലന്റെ വിജയത്തോടെ സി.കെ ചാമുണ്ണി വീണ്ടും ശ്രദ്ധേയനാകുന്നു. മണ്ഡലം തെരഞ്ഞെടുപ്പ് കമ്മിറ്റി സെക്രട്ടറിയായ ചാമുണ്ണിക്ക് ഇത് വീണ്ടും അഭിമാന നിമിഷങ്ങളാണ്. ഒന്നരപതിറ്റാണ്ടു കാലത്തോളം സി.പി.എം വടക്കഞ്ചേരി ഏരിയാ സെക്രട്ടറിയായിരുന്ന സി.കെ ചാമുണ്ണി ഇപ്പോള്‍ ആലത്തൂര്‍ ബ്ലോക്ക് പഞ്ചായത്ത് പ്രസിഡന്റാണ്. 2006-ല്‍ ആലത്തൂര്‍ നിയമസഭാ മണ്ഡലത്തില്‍നിന്നും സി.പി.എമ്മിലെ എം ചന്ദ്രന്‍ സംസ്ഥാനത്തു തന്നെ ഏറ്റവും ഉയര്‍ന്ന ഭൂരിപക്ഷത്തില്‍ നിയമസഭയില്‍ എത്തിയതിന്റെ അമരക്കാരനും ചാമുണ്ണിയായിരുന്നു. അന്നും എം ചന്ദ്രന്റെ തെരഞ്ഞെടുപ്പ് പ്രചാരണത്തിനു ചുക്കാന്‍ പിടിച്ചത് ചാമുണ്ണിയാണ്. ചാമുണ്ണി ഏരിയാ സെക്രട്ടറിയായിരുന്നപ്പോഴാണ് എം ചന്ദ്രന്‍ റെക്കോര്‍ഡ് ഭൂരിപക്ഷത്തില്‍ വിജയിച്ചത്. അന്നു തരൂര്‍ നിയമസഭാ മണ്ഡലം രൂപീകൃതമായിരുന്നില്ല.ചിട്ടയായ പ്രവര്‍ത്തനത്തിലൂടെ മണ്ഡലത്തില്‍ പാര്‍ട്ടിയുടെ സര്‍വാധിപത്യം സ്ഥാപിക്കാനുള്ള ചാമുണ്ണിയുടെ പാടവം ഒന്നുവേറെ തന്നെയാണ്.