മാഡ്രിഡ്: സൂപ്പര്‍ താരം ക്രിസ്റ്റ്യാനോ റൊണാള്‍ഡോ നേടിയ ഇരട്ട ഗോള്‍ മികവില്‍ സ്‌പോര്‍ടിങ് ഗിജോണിനെ 2-1നു വീഴ്ത്തി സ്പാനിഷ് ലാ ലിഗയില്‍ റയല്‍ മാഡ്രിഡ് വിജയക്കുതിപ്പ് തുടരുന്നു. പരുക്കിനെ തുടര്‍ന്നു നാലു മാസത്തേക്ക് കളിക്കളത്തില്‍ നിന്നു വിട്ടുനില്‍ക്കുന്ന ഗെരത് ബെയ്‌ലിന്റെ അഭാവത്തിലാണ് റയല്‍ കളത്തിലിറങ്ങിയത്.
ജയത്തോടെ നിലവിലെ ജേതാക്കളായ ബാഴ്‌സലോണയുമായി ഏഴു പോയിന്റിന്റെ വ്യക്തമായ ലീഡും റയല്‍ സ്വന്തമാക്കി.
കളി തുടങ്ങി അഞ്ചാം മിനുട്ടില്‍ തന്നെ ലഭിച്ച പെനാല്‍റ്റി വലയിലെത്തിച്ച് ക്രിസ്റ്റ്യാനോ റയലിനെ മുന്നിലെത്തിച്ചു. ലുക്കാസ് വാസ്‌ക്വസിനെ ബോക്‌സില്‍ വീഴ്ത്തിയതിനാണ് റയലിനു അനുകൂമായി പെനാല്‍റ്റി ലഭിച്ചത്. 18ാം മിനുട്ടില്‍ തന്റെ രണ്ടാം ഗോളിലൂടെ ക്രിസ്റ്റ്യാനോ പട്ടിക ഉയര്‍ത്തി. നാച്ചോയുടെ പാസില്‍ നിന്നു ക്രിസ്റ്റ്യാനോ ക്ലോസ് റേഞ്ച് ഹെഡ്ഡറിലൂടെ വല കുലുക്കുകയായിരുന്നു.
35ാം മിനുട്ടില്‍ കാര്‍ലോസ് കര്‍മോണ ഗിജോണിന്റെ ആശ്വാസ ഗോള്‍ നേടി. 78ാം മിനുട്ടില്‍ ഗിജോണിനു അനുകൂലമായി പെനാല്‍റ്റി ലഭിച്ചെങ്കിലും കിക്കെടുത്ത ഡുജെ കോപ്പിന്റെ ഷോട്ട് പുറത്തേക്കായതോടെ സമനില പിടിക്കാനുള്ള അവരുടെ അവസരം നഷ്ടപ്പെടുത്തി.
മറ്റൊരു മത്സരത്തില്‍ സെവിയ്യ 2-1നു വലന്‍സിയയെ കീഴടക്കി. ജയത്തോടെ 13 മത്സരങ്ങളില്‍ നിന്നു 33 പോയിന്റുമായി റയല്‍ ഒന്നാം സ്ഥാനത്ത്. ഇത്രയും കളികളില്‍ നിന്നു 27 പോയിന്റുമായി സെവിയ്യ രണ്ടാമത്. ഒരു കളി കുറച്ചു കളിച്ച ബാഴ്‌സലോണയ്ക്ക് 26 പോയിന്റ്.