ന്യൂഡല്‍ഹി: തമിഴ്‌നാട്ടില്‍ നടന്ന നിയമസഭാ തെരഞ്ഞെടുപ്പില്‍ സി.പി.എമ്മിന് ഒരുസീറ്റുപോലും ലഭിക്കാത്തത് അവരുടെ 'ദേശീയ പാര്‍ട്ടി' പദവിക്കു ഭീഷണിയാകുമെന്ന് ചൂണ്ടിക്കാണിക്കപ്പെടുന്നു. തമിഴ്‌നാട്ടില്‍ കുറഞ്ഞത് ഏഴു സീറ്റെങ്കിലും നേടിയാല്‍ മാത്രമേ ദേശീയ പാര്‍ട്ടി സ്ഥാനം നിലനിര്‍ത്താന്‍ സി.പി.എമ്മിനു കഴിയുമായിരുന്നുള്ളൂ. എന്നാല്‍ തമിഴ്‌നാട്ടില്‍ മത്സരിച്ച പത്തുസീറ്റുകളിലും സി.പി.എം തോല്‍വി ഏറ്റുവാങ്ങി.
ദേശീയ പാര്‍ട്ടി പദവി നിലനിര്‍ത്താന്‍ മൂന്നുമാനദണ്ഡങ്ങളാണുള്ളത്. ലോക്‌സഭാ തെരഞ്ഞെടുപ്പില്‍ നാലു സംസ്ഥാനങ്ങളില്‍ ആറു ശതമാനം വോട്ടോ അല്ലെങ്കില്‍ മൂന്ന് സംസ്ഥാനങ്ങളില്‍നിന്ന് ലോക്‌സഭയിലേക്ക് രണ്ടുശതമാനം സീറ്റുകളോ (11 എണ്ണം) അതുമല്ലെങ്കില്‍ ഏതെങ്കിലും നാലു സംസ്ഥാനങ്ങളില്‍ സംസ്ഥാന പാര്‍ട്ടിയെന്ന പദവിയോ ആവശ്യമാണ്. ഈ മൂന്ന് നിബന്ധനകളില്‍ ഒന്നുപോലും നിലവില്‍ സി.പി.എമ്മിനില്ല. നിലവില്‍ കേരളത്തിലും പശ്ചിമ ബംഗാളിലും ത്രിപുരയിലും മാത്രമാണ് സി.പി.എമ്മിനു സംസ്ഥാന പാര്‍ട്ടി എന്ന പദവിയുള്ളത്.
നാലു സംസ്ഥാനങ്ങളില്‍ നിയമസഭാ തെരഞ്ഞെടുപ്പില്‍ 30ല്‍ ഒരു സീറ്റ് എന്ന കണക്കിലാണു വിജയിക്കേണ്ടത്. എന്നാല്‍ ഇപ്പോള്‍ കേരളം, പഞ്ചിമബംഗാള്‍, ത്രിപുര എന്നീ മൂന്നു സംസ്ഥാനങ്ങളില്‍ മാത്രമാണ് 30ല്‍ ഒന്ന് എന്ന അനുപാതത്തില്‍ സി.പി.എമ്മിനു പ്രാതിനിധ്യമുള്ളത്. ക്യാപ്റ്റന്‍ വിജയകാന്ത് നേതൃത്വം നല്‍കിയ പീപ്പിള്‍സ് വെല്‍ഫെയര്‍ ഫ്രണ്ട് എന്ന മുന്നണിയുടെ ഭാഗമായിട്ടാണ് സി.പി.എമ്മും സി.പി.ഐയും ഇത്തവണ തമിഴ്‌നാട്ടില്‍ മത്സരിച്ചത്.
സി.പി.എമ്മിനു പുറമേ സി.പി.ഐക്കും തമിഴ്‌നാട്ടില്‍ അക്കൗണ്ട് തുറക്കാനായില്ല. 2000ല്‍ സി.പി.എമ്മിനു ദേശീയ പാര്‍ട്ടി പദവി നഷ്ടമായിരുന്നുവെങ്കിലും പിന്നീട് തെരഞ്ഞെടുപ്പു കമ്മിഷന്‍ ദേശീയ പാര്‍ട്ടിയാവാനുള്ള മാനദണ്ഡങ്ങളില്‍ ഇളവു വരുത്തിയതിനെ തുടര്‍ന്നാണ് ഈ സ്ഥാനം തിരിച്ചുകിട്ടിയത്. നിലവില്‍ സി.പി.എമ്മിനെ കൂടാതെ കോണ്‍ഗ്രസും ബി.ജെ.പിയുമാണ് ഇന്ത്യയിലെ ദേശീയ പാര്‍ട്ടികള്‍.