ഗൂഡല്ലൂര്‍: ഡിവിഷനിലെ വനത്തില്‍ രണ്ട് പുലികളെ ചത്തനിലയില്‍ കണ്ടെത്തി. മസിനഗുഡി വനത്തോട് ചേര്‍ന്ന സീഗൂരിലെ തോട്ടില്‍ അഞ്ച് വയസ് പ്രായമുള്ള ആണ്‍ പുലിയും ദേവാല കരിയശോല ടാന്‍ടി തേയില തോട്ടത്തില്‍ മൂന്ന് വയസ് പ്രായമുള്ള പുലിയെയുമാണ് ചത്തനിലയില്‍ കണ്ടെത്തിയത്.
സീഗൂരില്‍ പുലി ചത്ത വിവരമറിഞ്ഞ് സീഗൂര്‍ റെയ്ഞ്ചര്‍ രമേശിന്റെ നേതൃത്വത്തിലുള്ള വനപാലക സംഘം സ്ഥലത്തെത്തി പരിശോധന നടത്തി. ഡോ.വിജയരാഘവന്‍ പോസ്റ്റ്‌മോര്‍ട്ടം നടത്തിയ പുലിയെ പിന്നീട് വനത്തില്‍തന്നെ സംസ്‌കരിച്ചു. കരിയശോല ടാന്‍ടി തേയില തോട്ടത്തില്‍ കണ്ടെത്തിയ പുലിയെയും ഡോ. വിജയരാഘവനാണ് പോസ്റ്റ്‌മോര്‍ട്ടം നടത്തിയത്. റെയ്ഞ്ചര്‍ രാമചന്ദ്രന്റെ നേതൃത്വത്തിലുള്ള വനപാലക സംഘം സ്ഥലത്തെത്തിയാണ് പരിശോധന നടത്തിയത്. ഇരു സംഭവങ്ങളിലും വനംവകുപ്പ് അന്വേഷണം ആരംഭിച്ചിട്ടുണ്ട്.