തിരുവനന്തപുരം: നോട്ട് പ്രതിസന്ധിയെ തുടര്‍ന്നു തൊഴില്‍രഹിതരായ ആധാരമെഴുത്തു തൊഴിലാളികള്‍ക്കു ക്ഷേമനിധി ബോര്‍ഡില്‍ നിന്നും 25,000 രൂപ വീതം ആശ്വാസധനമായി അനുവദിച്ചു വിതരണം ചെയ്യണമെന്ന് കേരളാ സ്റ്റേറ്റ് ഡോക്കുമെന്റ് വര്‍ക്കേഴ്‌സ് യൂനിയന്‍ സംസ്ഥാന പ്രസിഡന്റ് കരകുളം ബാബുവും ജനറല്‍ സെക്രട്ടറി പോത്തന്‍കോട് ഹരിദാസും സര്‍ക്കാരിനോടും ക്ഷേമനിധി ബോര്‍ഡിനോടും അഭ്യര്‍ഥിച്ചു.
ഇക്കഴിഞ്ഞ ഓണത്തിന് ചില്ലിക്കാശുപോലും ബോര്‍ഡ് അനുവദിച്ചില്ല. പൂര്‍ണമായും ഉദ്യോഗസ്ഥഭരണ നിയന്ത്രണത്തിലുള്ള ബോര്‍ഡില്‍ ആധാരമെഴുത്തു തൊഴിലാളികളുടെ വിഹിതം മാത്രമാണുള്ളത്. കോടിക്കണക്കിനു രൂപ തൊഴിലാളികള്‍ ക്ഷേമനിധിയില്‍ നിക്ഷേപിച്ചിട്ടും ദുരിതവേളയില്‍ സഹായം അനുവദിക്കാത്തതു പ്രതിഷേധാര്‍ഹമാണ്. അടിയന്തരമായി സഹായധനം അനുവദിച്ചു വിതരണം ചെയ്യണമെന്ന് ആധാരമെഴുത്ത് യൂനിയന്‍ ആവശ്യപ്പെട്ടു.