തേഞ്ഞിപ്പലം:  ചേളാരി ഇന്ത്യന്‍ ഓയില്‍ കോര്‍പ്പറേഷന്‍ പ്ലാന്റിന് പുറക് വശത്തെ പറമ്പില്‍ തീ പടര്‍ന്നു  പിടിച്ചത് പരിഭ്രാന്തി പരത്തി.
ഇന്നലെ വൈകിട്ട് നാലരയോടെയാണ് ഐ.ഒ.സിക്ക് പിറക് വശത്തെ പറമ്പില്‍ ചേളാരി ചന്ത പ്രവര്‍ത്തിക്കുന്ന സ്ഥലത്ത് തീപിടിത്തമുണ്ടായത്. ചന്തയ്ക്ക് വേണ്ടി കെട്ടിയുണ്ടാക്കിയ ഷെഡുകളിലൊന്ന് പൂര്‍ണമായും കത്തിനശിച്ചു.
ഷെഡില്‍ സൂക്ഷിച്ചിരുന്ന നൂല്‍ചാക്കുകളും മറ്റു സാമഗ്രികളും അഗ്നിക്കിരയായി. രണ്ടാമത്തെ ഷെഡിലേക്ക് തീപടര്‍ന്നുപിടിക്കാന്‍ തുടങ്ങിയതോടെയാണ് തീപിടുത്തം ആളുകളുടെ ശ്രദ്ധയില്‍ പെട്ടത്. നാട്ടുകാര്‍ ഉടനെ തന്നെ പാത്രങ്ങളിലും മറ്റുമായി എത്തിച്ച വെള്ളമുപയോഗിച്ച് തീ പടര്‍ന്നു പിടിക്കുന്നത്  നിയന്ത്രിക്കുകയായിരുന്നു.
ഐ.ഒ.സി അധികൃതരെ വിവരം അറിയിച്ചെങ്കിലും പ്ലാന്റിലെ  ഫയര്‍ സിസ്റ്റം ആദ്യം പ്രവര്‍ത്തിപ്പിക്കാന്‍ സാധിക്കാത്തത് തിരിച്ചടിയായി.
തുടര്‍ന്ന് നാട്ടുകാര്‍ തന്നെ നടത്തിയ ശ്രമങ്ങള്‍ക്കൊടുവില്‍ ഐ.ഒ.സി  ഫയര്‍ സിസ്റ്റം ഉപയോഗിച്ച് വെള്ളം പമ്പ് ചെയ്ത് തീ പൂര്‍ണമായും  അണക്കുകയായിരുന്നു.  തീ പടര്‍ന്നുപിടിക്കാനുണ്ടായ കാരണം വ്യക്തമല്ല.