കൊച്ചി: ബൈക്ക് യാത്രികനെ ഇടിച്ചിട്ടശേഷം കാര്‍ നിര്‍ത്താതെ പോയ സംഭവത്തില്‍ നടന്‍ ശ്രീനാഥ് ഭാസിക്കെതിരെ കേസ്. കൊച്ചി സെന്‍ട്രല്‍ പൊലിസാണ് കേസെടുത്തത്. നടനെ അറസ്റ്റ് ചെയ്ത് വിട്ടയച്ചു. മട്ടാഞ്ചേരി സ്വദേശി മുഹമ്മദ് ഫഹീമാണ് പരാതിക്കാരന്‍. കഴിഞ്ഞ എട്ടിനായിരുന്നു അപകടം നടന്നത്. കാറില്‍ ഒപ്പമുണ്ടായിരുന്നവരെക്കുറിച്ച് പൊലിസ് അന്വേഷണം ആരംഭിച്ചു.

കുണ്ടന്നൂരിലെ ആഡംബര ഹോട്ടലിലെ ലഹരിപാര്‍ട്ടിയില്‍ പങ്കെടുത്തെന്ന സംശയത്തെ തുടര്‍ന്ന് ശ്രീനാഥ് ഭാസിയെ പൊലിസ് ചോദ്യം ചെയ്തിരുന്നു. കുണ്ടന്നൂരിലെ ഹോട്ടലില്‍ ലഹരിപ്പാര്‍ട്ടി നടത്തിയതിന് കുപ്രസിദ്ധ ഗുണ്ട ഓംപ്രകാശും കൂട്ടാളി ഷിഹാസും അറസ്റ്റിലായിരുന്നു. ഇവരെ സന്ദര്‍ശിച്ചെന്ന പേരിലാണ് നടന്‍ ശ്രീനാഥ് ഭാസി, നടി പ്രയാഗ മാര്‍ട്ടിന്‍ എന്നിവരെ പൊലിസ് ചോദ്യം ചെയ്തത്. എന്നാല്‍ ഇരുവര്‍ക്കും ഓംപ്രകാശുമായി നേരിട്ട് ബന്ധമില്ലെന്നാണ് ചോദ്യം ചെയ്യലില്‍ വ്യക്തമായത്. എങ്കിലും ബിനു ജോസഫിന്റെയും നടന്‍ ശ്രീനാഥ് ഭാസിയുടെയും സാമ്പത്തിക ഇടപാടുകളില്‍ പൊലീസിന് സംശയമുണ്ട്. ഇരുവരും തമ്മില്‍ മുന്‍പ് ലഹരി ഇടപാട് നടന്നിട്ടുണ്ടോ എന്ന് പരിശോധിക്കുംമെന്നും പൊലീസ് വ്യക്തമാക്കി.