കണ്ണൂര്‍: പൊലിസിന്റെ സൗജന്യയാത്ര അവസാനിപ്പിച്ചതിനെ തുടര്‍ന്ന് ബസുടമകളെയും തൊഴിലാളികളെയും പൊലിസ് പീഡിപ്പിക്കുന്നുവെന്നാരോപിച്ച് 9നു ജില്ലയില്‍ സ്വകാര്യ ബസ് പണിമുടക്ക് നടത്തുമെന്ന് ജില്ലാ ബസ് ഓപറേറ്റേഴ്‌സ് അസോസിയേഷന്‍ നേതാക്കള്‍ വാര്‍ത്താസമ്മേളനത്തില്‍ അറിയിച്ചു.
പല റൂട്ടുകളിലും ബസുകള്‍ പിടിച്ചിടുകയും ജീവനക്കാരെ നിസാരകാരണങ്ങള്‍ പറഞ്ഞു ചില എസ്.ഐമാരും   പൊലിസുകാരും പീഡിപ്പിക്കുകയാണ്. പിടിച്ചിട്ട ബസുകളില്‍ നിന്നു ഭീമമായ തുകയാണ് പിഴയായി ഈടാക്കുന്നത്. പിഴ അടക്കാന്‍ തയാറാകാത്ത ബസുകള്‍ ദിവസങ്ങളോളം പൊലിസ് സ്റ്റേഷനില്‍ പിടിച്ചിടുന്നുവെന്നും നേതാക്കള്‍ വാര്‍ത്താസമ്മേളനത്തില്‍ ആരോപിച്ചു. അസോസിയേഷന്‍ ചെയര്‍മാന്‍ വി.ജെ സെബാസ്റ്റിയന്‍, വൈസ് ചെയര്‍മാന്‍ കെ രാജ്കുമാര്‍, എം.വി വത്സലന്‍ പങ്കെടുത്തു.