തിരുവനന്തപുരം: ശനിയാഴ്ച ട്രഷറികളില്‍ പെന്‍ഷന്‍കാരും ശമ്പളക്കാരും പ്രതീക്ഷിച്ചത്ര എത്താതിരുന്നതിനാല്‍ ഇന്നു കൂടുതല്‍ പേര്‍ പണം പിന്‍വലിക്കാന്‍ സാധ്യത.
ഇന്നത്തെ ആവശ്യത്തിനായി 120-150 കോടി രൂപ വേണ്ടിവരുമെന്നു കണക്കാക്കുന്നു. 20 കോടി രൂപയോളം ക്ലോസിങ് ബാലന്‍സ് ഉള്ളതിനാല്‍ ട്രഷറി തുറന്നശേഷമേ എത്ര പണം(ഇംപ്രസ്റ്റ് ധനം) വേണമെന്നു കൃത്യമായി തിട്ടപ്പെടുത്താനാകൂ.
ശമ്പളം വാങ്ങുന്നവര്‍ കൂടുതലും ബാങ്ക് അക്കൗണ്ട് വഴിയായതിനാല്‍ അതിന് ആനുപാതികമായ പണം ബാങ്കുകള്‍ക്കും വേണ്ടിവന്നേക്കും. കാസര്‍കോട്, വയനാട്, ഇടുക്കി ജില്ലകളില്‍ ആവശ്യപ്പെട്ട മുഴുവന്‍ തുകയും ശനിയാഴ്ച നല്‍കിയിരുന്നു.
9.52 കോടി ആവശ്യപ്പെട്ട മലപ്പുറത്തിന് 3.72 കോടിയും 10.42 കോടി ആവശ്യപ്പെട്ട തിരുവനന്തപുരത്തിന് 10.17 കോടിയുമാണു ലഭിച്ചത്. കൊല്ലം, പത്തനംതിട്ട, ആലപ്പുഴ തുടങ്ങിയ മറ്റു ജില്ലകളിലും ആവശ്യമായത്ര തുക ലഭിച്ചില്ല.