നിലമ്പൂര്‍: നിലമ്പൂര്‍ ഉപജില്ലാ കലോത്സവത്തിന് ഗവ. മാനവേദന്‍ ഹയര്‍സെക്കന്‍ഡറി സ്‌കൂളില്‍ തുടക്കം. തിങ്കളാഴ്ച രാവിലെ പതാകയുയര്‍ത്തിയതോടെ മത്സരങ്ങള്‍ക്ക് തുടക്കമായത്. ഉച്ചക്ക് ശേഷം ഗവ.മോഡല്‍ യു.പി.സ്‌കൂളില്‍ നിന്നു വിവിധ സ്‌കൂളുകളുടെ നേതൃത്വത്തില്‍ ഘോഷയാത്ര നടന്നു. ബ്ലോക്ക് പഞ്ചായത്ത് പ്രസിഡന്റ് പി.പി സുഗതന്‍ കലോത്സവം ഉദ്ഘാടനം ചെയ്തു. നഗരസഭ ചെയര്‍പേഴ്‌സണ്‍ പത്മിനി ഗോപിനാഥ് അധ്യക്ഷയായി.
ചലച്ചിത്ര പിന്നണി ഗായകനും നടനുമായ കൃഷ്ണചന്ദ്രന്‍ മുഖ്യാതിഥിയായി. മേളയോടനുബന്ധിച്ചു പുറത്തിറക്കുന്ന സുവനീര്‍ ആര്യാടന്‍ ഷൗക്കത്ത് പ്രകാശനം ചെയ്തു. ഘോഷയാത്രയില്‍ പങ്കെടുത്ത് വിജയം നേടിയ സ്‌കൂളുകള്‍ക്കുള്ള സമ്മാനം നഗരസഭ വൈസ് ചെയര്‍മാന്‍ പി.വി.ഹംസ കൈമാറി.പ്രധാനാധ്യാപകന്‍ എ കൃഷ്ണദാസ്, എ.ഇ.ഒ പി വിജയന്‍, അധ്യാപക പ്രതിനിധികള്‍ സംസാരിച്ചു. നഗരസഭ സ്റ്റാന്‍ഡിങ് കമ്മിറ്റി അധ്യക്ഷന്‍മാര്‍ കൗണ്‍സില്‍മാര്‍, വിവിധ രാഷ്ട്രീയ സംഘടനാ പ്രതിനിധികള്‍ സംബന്ധിച്ചു.