മാഹി: ന്യൂ ഇയര്‍, ക്രിസ്മസ് ആഘോഷങ്ങള്‍ കണക്കിലെടുത്തു മാഹിയില്‍ നിന്നു കണ്ണൂര്‍, കോഴിക്കോട് ജില്ലകളിലേക്കു മദ്യകടത്തു വ്യാപകമാകുന്നു. സ്‌കൂള്‍ വിദ്യാര്‍ഥികള്‍ വരെ ഇതിന്റെ കരിയര്‍മാരായി പ്രവര്‍ത്തിക്കുന്നുണ്ടെണ്ടന്ന് എക്‌സൈസ് അധികൃതര്‍ പറയുന്നു. മദ്യക്കടത്തു തടയുന്നതിനായി എക്‌സൈസ് വിഭാഗം അന്വേഷണം ശക്തമാക്കി. അഞ്ചു പേര്‍ ചേര്‍ന്ന ഉദ്യോഗസ്ഥരുടെ സംഘങ്ങളാണു പരിശോധന നടത്തുന്നത്. അതിര്‍ത്തിയില്‍ അല്ലാതെ മറ്റു സ്ഥലങ്ങളിലും മാഹി റെയില്‍വേ സ്റ്റേഷനുകളിലും അന്വേഷണം ഊര്‍ജിതമാണ്. ഒരു ലിറ്റര്‍ മദ്യം കേരളത്തിലെത്തിയാല്‍ നാനൂറു രൂപയോളം കൈയില്‍ കിട്ടുന്നതാണു കടത്തു വര്‍ധിക്കാന്‍ കാരണം.
സ്‌കൂള്‍ വിദ്യാര്‍ഥികള്‍ വരെ ഇതിന്റെ കരിയര്‍മാരായി പ്രവര്‍ത്തിക്കുന്നുണ്ടെണ്ടന്നത് വളരെ ഗൗരവത്തോടെയാണ് അധികൃതര്‍ കാണുന്നത്. കഴിഞ്ഞ ഞായറാഴ്ച രാത്രി മാഹിയില്‍ നിന്നു കടത്തിയ ആറു ലിറ്റര്‍ മദ്യവുമായി ഓട്ടോറിക്ഷയില്‍ നിന്നു കോട്ടയം സ്വദേശി ജോണ്‍സണിനെ ന്യൂമാഹി ചെക്ക് പോസ്റ്റിലെ പ്രിവന്റിവ് ഓഫിസര്‍ കെ.ടി സുധീറും സംഘവും ചേര്‍ന്ന് അറസ്റ്റു ചെയ്തിരുന്നു.