സ്വന്തം ലേഖകന്‍
തിരുവനന്തപുരം: സര്‍ക്കാര്‍ ഓഫിസുകള്‍ അഴിമതി വിമുക്തമാക്കാന്‍ പുതിയ പദ്ധതികളുമായി വിജിലന്‍സ്. യുവാക്കളെയും സാധാരണക്കാരെയും വിജിലന്‍സിനോട് കൂടുതല്‍ അടുപ്പിക്കാനാണ് വിജിലന്‍സ് ഡയറക്ടര്‍ ജേക്കബ് തോമസ് പുതിയ പദ്ധതി തയ്യാറാക്കിയത്.
വായനശാലകളെയും ക്ലബുകളെയും അഴിമതി വിരുദ്ധ പ്രവര്‍ത്തനം നടത്തുന്ന വിവിധ പ്രാദേശിക സംഘടനകളെയും ഉള്‍പ്പെടുത്തിയാണ് അഴിമതിക്കാരെ പൂട്ടാനുള്ള നീക്കം. ക്ലബുകളും വായനശാലകളും വിജിലന്‍സ് ഡയറക്ടര്‍ നേരിട്ട് സന്ദര്‍ശിച്ചാണ് അവരെ വിജിലന്‍സിനൊപ്പം നിര്‍ത്താന്‍ ശ്രമം നടത്തുന്നത്.
ഇതുവരേ മൂന്നു ജില്ലകളിലെ സ്ഥാപനങ്ങള്‍ ജേക്കബ് തോമസ് സന്ദര്‍ശിച്ചുകഴിഞ്ഞു. വിവരം അറിയിക്കാന്‍ പ്രത്യേക നമ്പരും നല്‍കിയിട്ടുണ്ട്.
അഴിമതി കൂടുതല്‍ നടക്കുന്ന വില്ലേജ്, താലൂക്ക് ഓഫിസുകള്‍, വൈദ്യുതി, വാട്ടര്‍ അതോറിറ്റി ഓഫിസുകള്‍, പൊലിസ് സ്‌റ്റേഷനുകള്‍, രജിസ്‌ട്രേഷന്‍ ഓഫിസുകള്‍, സര്‍ക്കാര്‍ ആശുപത്രികള്‍ എന്നിവ നിരീക്ഷിച്ച് യഥാസമയം വിവരം നല്‍കണമെന്നാണ് നിര്‍ദേശം. കൂടാതെ അഴിമതിക്കാരുടെ വിവരങ്ങള്‍ കൈമാറാന്‍ പുതിയ മൊബൈല്‍ ആപ്പും തയ്യാറാക്കിയിട്ടുണ്ട്.
ഇതിനായി എറൈസിങ് കേരള, വിസില്‍ നൗ എന്നീ രണ്ട് മൊബൈല്‍ ആപ്പുകള്‍ വികസിപ്പിച്ചിരുന്നു. ഏതു വകുപ്പിലെയും അഴിമതി സംബന്ധിച്ച വിവരങ്ങള്‍ ഇതിലൂടെ ജനങ്ങള്‍ക്ക് വിജിലന്‍സിനെ അറിയിക്കാം. ആപ്പിലൂടെ ചിത്രങ്ങളും വീഡിയോയും അയക്കാം.
ഇവ ഓരോ ദിവസവും പരിശോധിച്ച് നടപടികള്‍ എടുക്കും. ഇതിനായി വിജിലന്‍സ് ആസ്ഥാനത്ത് പ്രത്യേക സംഘത്തെയും നിയോഗിച്ചിട്ടുണ്ട്.