കളമശ്ശേരി: വിവാഹ തട്ടിപ്പും പണം തട്ടിപ്പും നടത്തിയയാളെ കളമശേരി പൊലിസ് പിടികൂടി. കൊല്ലം മങ്ങാട് ശാസ്ത അമ്പലത്തിനു സമീപം സരിതാ ഭവനില്‍ രവി (38)യെയാണ് കളമശേരി സബ് ഇന്‍സ്പക്ടര്‍ ഇ.വി ഷിബുവും സംഘവും അറസ്റ്റ് ചെയ്തത്.
ഇടപ്പള്ളി വട്ടേക്കുന്നത്ത് താമസിക്കുന്ന സ്ത്രീയെ വിവാഹം കഴിച്ച ശേഷം അവരുടെ കൈയില്‍ നിന്നാണ് 3.30 ലക്ഷം രൂപ തട്ടിയെടുത്തത്. സ്ത്രീക്ക് വിവാഹം ആവശ്യമുണ്ടെന്ന് കാട്ടി പത്രപരസ്യം നല്‍കിയിരുന്നു. ഈ പരസ്യം കണ്ട് രവി വട്ടേക്കുന്നത് താമസിക്കുന്ന സ്ത്രീയുടെ വീട്ടുകാരുമായി ബന്ധപ്പെടുകയായിരുന്നു. തുടര്‍ന്ന് 2013 നവംബറില്‍ ഇടപ്പള്ളിയിലെ ഒരു ഹാളില്‍ വിവാഹം നടത്തി. ഈ വിവാഹത്തിനു മുന്‍പ് രവി കൊല്ലത്ത് നിന്ന് മറ്റൊരു സ്ത്രീയെ വിവാഹം കഴിച്ചിരുന്നു. ഇതില്‍ കുട്ടികളുണ്ടെന്ന് പൊലിസ് പറഞ്ഞു. ഇത് മറച്ച് വച്ചാണ് വട്ടേക്കുന്നത്തെ സ്ത്രീയെ വിവാഹം കഴിച്ചത്. കൊല്ലത്തെ ഭാര്യയോടും കുടുബത്തോടും രവി പറഞ്ഞിരുന്നത് താന്‍ ഗള്‍ഫിലാണെന്നാണ്. ഇതു തന്നെ വട്ടേക്കുന്നത്തെ സ്ത്രീയോടും പറഞ്ഞിരുന്നു. ഇവരുടെ പക്കല്‍ നിന്ന് പലതവണയായി 3.30 ലക്ഷം രുപ രവി വാങ്ങിയിരുന്നു. ഈ തുകയില്‍ നല്ലൊരു ഭാഗം കൊല്ലത്തുള്ള ആദ്യ ഭാര്യക്കും കുട്ടികള്‍ക്കുമായി അയച്ച് കൊടുത്തു. ഇതു കുടാതെ വട്ടേക്കുന്നത്തെ സ്ത്രീയുടെ ഇരുചക്രവാഹനവും ഇയാള്‍ കൊണ്ടുപോയി തിരുവനന്തപുരത്ത് വിറ്റു. ഇതേ തുടര്‍ന്ന് സംശയം തോന്നിയ വട്ടേക്കുന്നത്തെ സ്ത്രീയുടെ പരാതിയെ തുടര്‍ന്നാണ് പൊലിസ് രവിയെ അറസ്റ്റ് ചെയ്തത്. അറസ്റ്റ് ചെയ്ത സംഘത്തില്‍ എ.എസ്.ഐമാരായ ഷാജു, ജോണ്‍, എന്നിവരും പൊലിസ് ഉദ്യോഗ്യസ്ഥരായ വിജയകുമാര്‍, അനസ്, സുരേഷ്, അമൃത എന്നിവരുണ്ടായിരുന്നു.