തേഞ്ഞിപ്പലം: കാലിക്കറ്റ് സര്‍വകലാശാല സ്റ്റേഡിയത്തില്‍നിന്ന് അറുപതാമത് സംസ്ഥാന കായികോത്സവം പടിയിറങ്ങിയെങ്കിലും ഇവിടെ കായിക ആവേശവും ആരവവും നിലക്കില്ല. കായികോത്സവത്തിനു തൊട്ടുപിന്നാലെ ഈ മാസം 10 മുതല്‍ 14 വരെ സൗത്ത് ഇന്ത്യ ഇന്റര്‍ യൂനിവേഴ്‌സിറ്റി വിമണ്‍ ബാസ്‌ക്കറ്റ്‌ബോള്‍ ചാംപ്യന്‍ഷിപ്പെത്തും.
ഇതിനിടയില്‍ സി.ബി.എസ്.ഇ ജില്ലാ കായികമേളയുമുണ്ട്. അതുകഴിഞ്ഞ് 19 മുതല്‍ 21 വരെയാണ് യൂനിവേഴ്‌സിറ്റി അത്‌ലറ്റിക്‌സ് മീറ്റ്. കാലിക്കറ്റ് സര്‍വകലാശാലയ്ക്കു കീഴിലെ ആയിരത്തി അഞ്ഞൂറോളം കായികതാരങ്ങള്‍ മീറ്റില്‍ പങ്കെടുക്കും. അറുപതോളം ഒഫിഷ്യല്‍സുമുണ്ടാകും.
മീറ്റ് കഴിഞ്ഞ് ദിവസങ്ങള്‍ക്കുള്ളില്‍ ഇന്റര്‍ യൂനിവേഴ്‌സിറ്റി വിമണ്‍ വോളിബോള്‍ ചാംപ്യന്‍ഷിപ്പിനും കാലിക്കറ്റ് കാംപസ് വേദിയാകും. 24 മുതല്‍ 29വരെയാണ് ഇന്റര്‍ യൂനിവേഴ്‌സിറ്റി വിമണ്‍ വോളിബോള്‍ ചാംപ്യന്‍ഷിപ്പ്. അടുത്ത വര്‍ഷം ആദ്യത്തിലും സര്‍വകലാശാല സ്റ്റേഡിയത്തില്‍ കായികമത്സരങ്ങള്‍ നടക്കും.