മലയിന്‍കീഴ്: ഊരൂട്ടമ്പലം റോഡിലുള്ള ഒരുനൂറ്റാണ്ടു പഴക്കമുള്ള അണപ്പാട് പാലം ജീര്‍ണാവസ്ഥയില്‍. പാലം എപ്പോള്‍ വേണമെങ്കിലും ഇടിഞ്ഞ് വീഴാമെന്ന സ്ഥിതിയിലാണ്. വെള്ളപ്പൊക്കമുണ്ടായാല്‍ പാലം ഒലിച്ചുപോകുകയോ തകരുകയോ ചെയ്യും. പാലത്തിന്റെ അടിഭാഗത്ത് നിന്ന് കോണ്‍ക്രീറ്റിനുള്ളില്‍ നിന്നുള്ള കമ്പികള്‍ ഇളകിമാറിയിട്ടുണ്ട്.
പാലത്തിന്റെ അടിസ്ഥാന കരിങ്കല്‍ കെട്ടുകളെ തമ്മില്‍ ബന്ധിപ്പിച്ചിരുന്ന പ്ലാറ്റ്‌ഫോം കല്ലുകള്‍ 2011 ലുണ്ടായ വെള്ളപ്പൊക്കത്തില്‍ ഒലിച്ച് പോയി. പാലത്തിന് ചുവട്ടില്‍ നിന്നും അനധികൃതമായി മണ്ണ് മാറ്റിയതായിരുന്നു കാരണം. ഇരുവശത്തുമുള്ള കരിങ്കല്‍ കെട്ടിന്റെ ബലത്തിലാണ് പാലം ഇപ്പോള്‍ നിലനില്‍ക്കുന്നത്. കഴിഞ്ഞ ദിവസം ടാര്‍സണ്‍ ലോറി ചരക്കുമായി പാലം കടന്നു പോയപ്പോള്‍ അടിത്തട്ടിലെ കമ്പി ഉഗ്രശബ്ദത്തോടെ ഇളകിമാറിയെന്നു പരിസരവാസികള്‍ പറഞ്ഞു.
ബാലരാമപുരം, നെയ്യാറ്റിന്‍കര ഭാഗത്തേക്ക് പോകുന്ന വാഹനങ്ങള്‍ക്ക് പുറമേ തിരുവനന്തപുരം ഭാഗത്ത് നിന്ന് തമിഴ്‌നാട്ടിലേക്ക് പോകാനും ഡ്രൈവര്‍മാര്‍ മലയിന്‍കീഴ്-ഊരൂട്ടമ്പലം റോഡാണ് തിരഞ്ഞെടുക്കാറുള്ളത്. ഹെവി വാഹനങ്ങള്‍ ലോഡുമായി പോകുന്നത് നിയന്ത്രിക്കാന്‍ മുന്‍കരുതലില്ലാത്തതിനാല്‍ അന്യ സംസ്ഥാനങ്ങളില്‍ നിന്നുള്ള അനധികൃത സാധനങ്ങള്‍ കൊണ്ടുപോകുന്നതും ഇതുവഴിയാണത്രേ. അപകടം സംഭവിക്കുന്നത് വരെ കാത്തു നില്‍ക്കാതെ പുതിയ പാലം നിര്‍മാണത്തിന് അടിയന്തര നടപടിയെടുക്കണമെന്ന ആവശ്യം ശക്തമാണ്.