ന്യൂഡല്‍ഹി: നോട്ട് നിരോധനത്തില്‍ തുടര്‍ച്ചയായി മൂ്ന്നാമത്തെ ആഴ്ച്ചയും പാര്‍ലമെന്റ് നടപടികള്‍ തടസ്സപ്പെടുന്നതില്‍ ക്ഷുഭിതനായി മുതിര്‍ന്ന ബി.ജെ.പി നേതാവ് എല്‍.കെ അദ്വാനി.

ആരാണ് സഭ നടത്തേണ്ടത്. സഭ സ്വയം പ്രവര്‍ത്തിക്കുകയാണോയെന്നും അദ്ദേഹം ചോദിച്ചു. മുതിര്‍ന്ന സഹപ്രവര്‍ത്തകനും പാര്‍ലമെന്ററി പാര്‍ട്ടി നേതാവുമായ അനന്ദ് കുമാറിനോടോയിരുന്നു അദ്വാനിയുടെ രോഷപ്രകടനം. സ്പീക്കറോ പാര്‍ലമെന്ററി കാര്യ മന്ത്രിയോ സഭ നിയന്ത്രിക്കുന്നതില്‍ ശ്രദ്ധിക്കുന്നില്ലെന്നും അദ്വാനി പറഞ്ഞു.

ഉച്ചഭക്ഷണത്തിന് മുമ്പ് പ്രതിപക്ഷ ബഹളത്തെ തുടര്‍ന്ന് സഭ 15 മിനുട്ട് നിര്‍ത്തിവച്ചപ്പോഴായിരുന്നു മന്ത്രിയെ തന്റെ സീറ്റിനരികിലേക്ക് വിളിച്ചു വരുത്തി അദ്വാനി ഇത്തരത്തില്‍ ക്ഷുഭിതനായത്.

അദ്വാനിയെ ശാന്തനാക്കാന്‍ അനന്ദ്കുമാര്‍ ശ്രമിച്ചെങ്കിലും നടന്നില്ല. മാധ്യമപ്രവര്‍ത്തകര്‍ എല്ലാം കാണുന്നുണ്ടെന്ന് അദ്ദേഹം ഓര്‍മിപ്പിച്ചെങ്കിലും 'ഞാന്‍ ഇത് പരസ്യമായി പറയാന്‍ പോകുകയാണ്. ഞാന്‍ സ്പീക്കറോട് പറയും. സഭ സമാധാനപരമായി നടക്കുന്നുണ്ടെന്ന് ഉറപ്പുവരുത്താന്‍ ഭരണപക്ഷത്തിനും പ്രതിപക്ഷത്തിനും ഒരുപോലെ ചുമതലയുണ്ട്' എന്നായിരുന്നു ഇതിന് അദ്വാനിയുടെ മറുപടി.