മഞ്ചേരി: ജില്ലയില്‍ ജല അതോറിറ്റി ഓഫിസുകളുടെ കംപ്യൂട്ടര്‍വല്‍ക്കരണം പുരോഗമിക്കുന്നു. എടപ്പാള്‍ ഡിവിഷന്റെ കീഴിലുള്ള പൊന്നാനി, എടപ്പാള്‍ സെക്ഷനുകളിലും മലപ്പുറം ഡിവിഷന്റെ കീഴിലുള്ള മലപ്പുറം, മഞ്ചേരി സെക്ഷന്‍ ഓഫിസുകളിലുമാണ് ആദ്യഘട്ട കംപ്യൂട്ടര്‍വല്‍ക്കരണ പ്രവൃത്തികള്‍ നടന്നുവരുന്നത്. ജല അതോറിറ്റിതന്നെ രൂപപ്പെടുത്തിയ ഇ-അബാകസ് എന്ന സോഫ്റ്റ്‌വെയര്‍ ഉപയോഗിച്ചാണ് പ്രവര്‍ത്തനം പുരോഗമിക്കുന്നത്. മീറ്റര്‍ റീഡര്‍മാര്‍ രണ്ടു മാസത്തെ റീഡിങ് എടുത്ത് ഓഫിസില്‍ രേഖപ്പെടുത്തിയാണ് കംപ്യൂട്ടര്‍ ബില്‍ എത്തിക്കുന്നത്. ഓഫിസുകളുടെ കംപ്യൂട്ടര്‍വല്‍ക്കരണം പൂര്‍ത്തിയായാല്‍ വീട്ടിലെത്തി ബില്‍ നല്‍കുന്ന സംവിധാനത്തിലേക്കു മാറാന്‍ സാധിക്കും. ഇതിനു രണ്ടു മാസമെങ്കിലും എടുക്കുമെന്നാണ് അറിയുന്നത്.
നേരത്തെ ഇത് ആറുമാസത്തിന് ശേഷം റീഡിങ് എടുത്ത് നോട്ടീസ് നല്‍കുന്ന രീതിയില്‍ ആയിരുന്നതിനാല്‍ ഉപഭോക്താക്കള്‍ക്ക് പ്രയാസമുണ്ടാക്കിയിരുന്നു. സംസ്ഥാനത്ത് മിക്ക ജില്ലകളിലും കംപ്യൂട്ടര്‍വല്‍ക്കരണം നടപ്പിലാക്കിയിട്ടുണ്ട്. ഇതിനായി എല്ലാ ജില്ലകള്‍ക്കും കംപ്യൂട്ടറുകളും യു.പി.എസുകളും നല്‍കിയിരുന്നു. എന്നാല്‍, സോഫ്റ്റ്‌വെയര്‍ ലഭിക്കാത്തതുകാരണം ജില്ലയിലെ നടപടികള്‍ വൈകുകയായിരുന്നു.