ന്യൂഡല്‍ഹി: ബംഗാളിലെ ടോള്‍ ബൂത്തുകളില്‍ സൈന്യത്തെ വിന്യസിച്ചതിനെതിരായ മുഖ്യമന്ത്രി മമതാ ബാനര്‍ജിയുടെ ആരോപണങ്ങള്‍ വേദനിപ്പിച്ചുവെന്ന് പ്രതിരോധ മന്ത്രി മനോഹര്‍ പരീക്കര്‍. താങ്കളെപോലെ അറിവും പൊതുരംഗത്ത് പരിചയവുമുള്ള ഒരാളില്‍ നിന്നും ഇത്തരത്തിലൊരു നടപടി പ്രതീക്ഷിച്ചില്ലെന്നും പരീക്കര്‍ പറഞ്ഞു. മമതക്കെഴുതിയ കത്തിലാണ് പരമാര്‍ശം.

രാഷ്ട്രീയ പാര്‍ട്ടികളും രാഷ്ട്രീയക്കാരും പലപ്പോഴും ഒരു അടിസ്ഥാനരഹിതമായി ആരോപണങ്ങള്‍ ഉന്നയിക്കാറുണ്ട്. എന്നാല്‍, സൈന്യത്തെക്കുറിച്ച് പരാമര്‍ശിക്കുമ്പോള്‍ കുറച്ചുകൂടി ശ്രദ്ധപുലര്‍ത്തേണ്ടതുണ്ടെന്നും പരീക്കര്‍ കത്തില്‍ പറയുന്നു. സംഭവത്തിന്റെ നിജസ്ഥിതി സംസ്ഥാനത്തെ ബന്ധപ്പെട്ട ഉദ്യോഗസ്ഥരോട് അന്വേഷിച്ചാല്‍ അറിയാന്‍ സാധിക്കുമെന്നും പരീക്കര്‍ വ്യക്തമാക്കുന്നു.

ഈ മാസം ഒന്നിനാണ് ടോള്‍ ബൂത്തുകളില്‍ സൈന്യത്തെ നിയോഗിച്ചത്. സംസ്ഥാന സര്‍ക്കാരിനോട് ആലോചിക്കാതെയാണ് സൈന്യം ടോള്‍ ബൂത്തുകളില്‍ നിലയുറപ്പിച്ചതെന്നും നോട്ടു പിന്‍വലിക്കല്‍ വിഷയത്തില്‍ പ്രതിഷേധിച്ചതിന് കേന്ദ്രസര്‍ക്കാറിന് തന്നോടുള്ള പ്രതികാരമായിരുന്നു ഈ പ്രവൃത്തിയെന്നുമാണ് വിഷയത്തില്‍ മമത പ്രതികരിച്ചത്. സൈന്യത്തെ പിന്‍വലിക്കാതെ ഓഫിസ് വിടില്ലെന്നും പറഞ്ഞ് അവര്‍ സമരം നടത്തുകയും ചെയ്തിരുന്നു.